2011年7月7日 星期四

【看世事講台語】魚趁鮮 人趁茈



台語編輯 / 李江却台語文教基金會


標題:『阿毛的鞋』看爸仔囝中間的一點一注
華語:短片"阿毛的鞋" 看父子生活點滴
『阿毛的鞋』khuànn pē-á-kiánn tiong-kan ê tsi̍t-tiám-tsi̍t-tuh.


標題:主角細漢歹扭搦 影片記錄有到角
華語:小主角難掌控 影片記錄貼近生活
Tsú-kak sè-hàn pháinn liú-la̍k, iánn-phìnn kì-lio̍k ū kàu-kak.

標題:『阿毛的鞋』著華人創意短片頭賞
華語:"阿毛的鞋" 華人創意短片首獎
『阿毛的鞋』tio̍h Huâ-jîn tshòng-ì té-phìnn thâu-siúnn

諺語:魚趁鮮,人趁茈。
Hî thàn tshinn, lâng thàn tsínn.

這句諺語有兩个意思,其中一个是鼓勵咱人著趁少年ê時拍拚做一寡有意義ê代誌。這五个大學生透過畢業短片,紀錄家庭內底幼秀ê感情互動,mā透過這个作品,展現in本身ê專業kap才情。
 
 
*影片內底的囡仔


爸爸 你明仔載會去參加
Pa-pa, lí bîn-á-tsài ē khì tsham-ka

學校的校外活動–無?
ha̍k-hāu ê hāu-guā oa̍h-tāng–bô?

讀國校一年的『阿毛』
Tha̍k kok-hāu it-nî ê “A Mâu”

邀請爸爸參加學校的校外活動
iau-tshiánn pa-pa tsham-ka ha̍k-hāu ê hāu-guā ua̍h-tāng

爸爸因為工課真無閒
pa-pa in-uī khang-khuè tsin bô-îng

無法度來參加
bô-huat-tōo lâi tsham-ka

予『阿毛』真失望
hōo “A Mâu” tsin sit-bāng

這塊(支)片號名叫做『阿毛的鞋』
tsit tè(ki)phìnn hō-miâ kiò-tsò “A Mâu ê ê”

講著小朋友和爸爸做伙生活的種種情形
kóng tio̍h sió-pîng-iú hām pa-pa tsò-hué senn-ua̍h ê tsióng-tsióng tsîng-hîng

對三萬外个作品中
tuì sann-bān guā ê tsok-phín tiong

提著第四屆華人創意短片比賽的最佳短片獎
the̍h-tio̍h tē-sì kài Huâ-jîn tshòng-ì té-phìnn pí-sài ê tsuè-ka té-phìnn tsióng

*阿毛

我感覺阮爸爸攏無愛我
Guá kám-kak guán pa-pa lóng bô-ài–guá

逐工攏咧上班
ta̍k-kang lóng leh siōng-pan


*『阿毛的鞋』導演 劉朋君

為啥物欲號做『阿毛的鞋』
Uī-siánn-mi̍h beh hō-tsò “A Mâu ê ê”

這个名若像真奇怪
tsit ê miâ ná-tshiūnn tsin kî-kuài

事實上 鞋仔是代表囡仔對老爸的希望
sū-si̍t siōng ê-á sī tāi-piáu gín-á tuì lāu-pē ê hi-bāng

因為伊一轉去厝
in-uī i tsi̍t tńg-khì tshù

就會直直看鞋仔櫃
tō ē ti̍t-ti̍t khuànn ê-á kuī

所以當結局
sóo-í tng kiat-kio̍k

看著爸爸的鞋仔轉來–ah
khuànn-tio̍h pa-pa ê ê-á tńg–lâi-ah

伊就真歡喜共鞋仔關(佇鞋櫥仔)起來
i tō tsin huann-hí kā ê-á kuainn(tī ê-tû-á)–khí-lâi

這塊(支)片是台南崑山科技大學
Tsit tè(ki)phìnn sī Tâi-lâm Khun-san kho-ki tāi-ha̍k

五个畢業生開一個月時間
gōo ê pit-gia̍p-sing khai tsi̍t kó-gue̍h sî-kan

來攝影製作
lâi liap-iánn tsè-tsok

因為小朋友成長佇無仝的家庭背景環境
in-uī sió-pîng-iú sîng-tióng tī bô-kâng ê ka-tîng puē-kíng khuân-kíng

反應出現代親子互動關係
huán-ìng tshut hiān-tāi tshin-tsú hōo-tōng kuan-hē

雖然佇拍片過程中
sui-jiân tī phah-phìnn kuè-thîng tiong

小朋友有時真歹控制
sió-pîng-iú ū-sî tsin pháinn khòng-tsè

但是按呢顛倒反應出
tān-sī án-ne tian-tò huán-ìng tshut

閣較生活化的感覺
koh-khah senn-ua̍h-huà ê kám-kak

*『阿毛的鞋』導演 劉朋君

是用比較較輕鬆的方式
Sī īng pí-kàu khah khin-sang ê hong-sik

你嘛會當體會著講
lí mā ē-tàng thé-huē tio̍h kóng

你佮厝內人之間
lí kap tshù-lāi-lâng tsi-kan

敢是變較疏遠抑是按怎
kám-sī piàn khah soo-uán ia̍h-sī án-tsuánn

予爸爸媽媽感覺
hōo pa-pa ma-ma kám-kak

無論你是雙親抑是單親家庭
bô-lūn lí sī siang-tshin ia̍h-sī tan-tshin ka-tîng

你敢是陪囡仔的時間變少–ah
lí kám-sī puê gín-á ê sî-kan piàn tsió–ah

導演劉朋君真歡喜表示
Tō-ián Lâu Pîng-kun tsin huann-hí piáu-sī

佇咧三萬外个參賽影片中
tī-leh sann-bān guā ê tsham-sài iánn-phìnn tiong

為台灣提著這个獎項
uī Tâi-uân the̍h-tio̍h tsit ê tsióng-hāng

伊感覺真歡喜
i kám-kak tsin huann-hí

雖然當時kan-ta是欲製作畢業的影片
sui-jiân tong-sî kan-ta sī beh tsè-tsok pit-gia̍p ê iánn-phìnn

但是會當佇學生時代享受互相合作的感覺
tān-sī ē-tàng tī ha̍k-sing sî-tāi hiáng-siū hōo-siōng ha̍p-tsok ê kám-kak

共想欲講的故事
kā siūnn-beh kóng ê kòo-sū

用影片來展現
īng iánn-phìnn lâi tián-hiān

嘛會當予家己有所成長
mā ē-tàng hōo ka-kī iú-sóo sîng-tióng