2014年3月27日 星期四

2013【阿却賞】台語文學研究(論文)研究生組─王一如



台語文學研究(論文)研究生組

王一如 簡介

王一如,1987年tī彰化市一个平凡ê大家庭內底出世,自細漢阿媽就tiāⁿ-tiāⁿ教我唱台語歌,hō͘我感覺台語實在真趣味,自hit-tang-tsūn開始我就對語言kap文學產生真大ê興趣。高中開始,我ê文學創作lóng無斷站,音樂比賽ê成績mā真顯目。大學讀國立台中教育大學台灣語文學系輔修音樂學系,tī修業期間我學習著真濟我進前無接觸過ê物件,親像是台語ê拼音、客語ê發音,讀無仝時代ê台灣文學作品kap分析。Tuì大三開始擔任教授ê國科會研究助理,進一步學習著收集台語語料ê工夫。Tī 2009到2011年擔任台灣羅馬字協會行政助理,koh協助編輯定期發行ê通訊。另外,為著koh-khah提升我對台灣語文kap文學ê素養,參加過真濟擺ê學術研討會,mā bat擔任過台語營ê工作人員,並且tī 2010年擔任由台灣羅馬字協會主辦ê第十四屆世界台語文化營晚會鋼琴表演,包括郭芝苑鋼琴曲kap張炫文、蕭泰然台語創作歌曲演出。母語認證合格證書ê部份,tī 2007年通過行政院客家委員

會所舉辦ê客語檢定,hō͘我對家己ê客語能力有進一步ê肯定。2009年通過由臺中教育大學臺灣語文學系舉辦ê閩南語檢定合格。並且tī 2011年通過由國立成功大學台灣語文測驗中心舉辦ê全民台語認證高級kap教育部閩南語語言能力認證考試高級。Tio̍h獎作品方面,有〈論陳明仁台語劇本ê語詞風格──以《A-chhûn》做例〉、〈論郭芝苑音樂ê本土創作kap語言現象〉tsit兩篇論文入選2008年kap 2009年阿却(A-khioh)賞大學生組[台語文學論文研究]獎項,2011年以〈過身〉得著阿却(A-khioh)賞Lā-pue(黑面琵鷺)二賞;除了án-ne,我mā以【踮tī天頂的阿媽】得著「97年用咱的母語寫咱的文學/用恩兜个母語寫恩兜个文學創作獎」閩南語散文類大專校院學生組第二名以及【八卦山ê過客】得著98年教育部臺灣閩客語文學獎臺灣閩南語學生組現代詩第三名ê好成績。Tī前年6--月受邀請參加由李江却台語文教基金會、首都詩報社kap台灣海翁台語文教育協會共同主辦ê『詩行2011年度台語詩人大會』, tī 6月25踮國立台灣文學館發表作品;今年7--月koh以〈過身〉tsit首詩koh入選

《2012台文通訊BONG報年度選》。另外tī閩南語字音字形比賽成績mā嶄然仔優秀,大學期間我參加過兩擺「彰化縣鄉土語文競賽社會組閩南語標音」,lóng得著第三名,參加「97年全國閩客語字音字形競賽」閩南語組大專院校學生組第二名。2011年參加學校舉辦「100年全校國語文競賽閩南語字音字形」得著第一名ê殊榮,代表國立台灣師範大學參加全國語文競賽也tio̍h第二名;舊年kap今年(2013年)參加「彰化縣語文競賽」提著社會組閩南語字音字形第一名,自án-ne代表彰化縣參加全國語文競賽。有tsit寡肯定hō͘我對家己ê學習增加koh-khah大ê信心。

碩士論文主要是leh研究陳明仁小說中ê語詞使用情形,用語言學ê角度去分析文學作品,運用量化ê形式進行分類探討,希望透過tsit款研究ê方法ē-tàng提供逐家無仝ê思考kap貢獻。7月份畢業了後,現此時tī彰化縣南郭國小擔任實習教師,相信總有一工有才調盡我ê能力kā台語美麗ê所在報hō͘ koh-khah濟人知影。