2011年6月21日 星期二

【看世事講台語】一丈差九尺





台語編輯 / 李江却台語文教基金會


標題:台派社團組聯盟 抗議教育部無公平
Tâi-phài siā-thuân tso͘ liân-bîng, khòng-gī Kàu-io̍k-pō͘ bô kong-pîng

標題:華語食甲飽閣醉 台灣母語一節怎止飢
Huâ-gí tsia̍h kah pá koh tsuì, Tâi-uân bó-gí tsi̍t tsiat tsuáⁿ tsí-ki




諺語:一丈差九尺
Tsi̍t tn̄g tsha káu tshioh.

華語的『天壤之別』。對小學到大學,華語的教學時數是台灣各族群語言的數十倍,佔台灣人口90%以上的原住民語、客家語佮台語是按怎比華語較細漢?華語佮台灣各族語所得著的教育資源真正是「一丈差九尺」。


還我台灣語文教育權

Hîng guá Tâi-uân gí-bûn kàu-io̍k-kuân

成大台文系副教授蔣為文
Sing-tāi Tâi-bûn-hē hù-kàu-siū Tsiúnn-uî-bûn

帶領幾若个本土團體去教育部陳情
tài-niá kuí-nā-ê pún-thóo thuân-thé khì Kàu-io̍k-pōo tîn-tsîng

要求教育部愛重視各級學校的台灣語文教育
iau-kiû Kàu-io̍k-pōo ài tiōng-sī kok kip ha̍k-hāu ê Tâi-uân gí-bûn kàu-io̍k

蔣為文前一工才佇咧台南的研討會
Tsiúnn-uî-bûn tsîng tsi̍t kang tsiah tī-leh Tâi-lâm ê gián-thó-huē

當面共政大台文所所長陳芳明唱聲
tng-bīn kā Tsìng-tāi Tâi-bûn-sóo sóo-tiúnn Tân Hong-bîng tshiàng-siann

講伊是台語文學的青盲牛
kóng i sī Tâi-gí-bûn-ha̍k ê tshenn-mê-gû

上北砲火仝款是真強
tsiūnn-pak phàu-hué kâng-khuán sī tsin kiông

直接批評政大台文所無教台灣語文
ti̍t-tsiap phue-phîng Tsìng-tāi Tâi-bûn-sóo bô kà Tâi-uân gí-bûn

這是獨裁的表現
tse sī to̍k-tshâi ê piáu-hiān

*蔣為文副教授 成功大學台文系

包括伊的畢業的要求
Pau-kuat i ê pit-gia̍p ê iau-kiû

伊要求愛有英語
i iau-kiû ài ū Ing-gí

愛有第二个外語
ài ū tē-jī ê guā-gí

但是對台灣本土的語文
tān-sī tuì Tâi-uân pún-thóo ê gí-bûn

煞攏無要求
suah lóng bô iau-kiû

所以咱對伊按呢的行為
sóo-í lán tuì i án-ne ê hîng-uî

按呢的做法
án-ne ê tsò-huat

這種獨裁
tsit tsióng to̍k-tshâi

這種獨尊華語的做法
tsit tsióng to̍k-tsun Huâ-gí ê tsò-huat

咱共提出質疑
lán kā thê-tshut tsit-gî

蔣為文亦抗議目前小學到大學
Tsiúnn-uî-bûn ia̍h khòng-gī bo̍k-tsiân sió-ha̍k kàu tāi-ha̍k

逐禮拜華語 英語課
ta̍k lé-pài Huâ-gí Ing-gí khò

平均總時數
pîng-kun tsóng sî-sòo

有十七到二十四節課
ū tsa̍p-tshit kàu jī-tsa̍p-sì tsiat khò

猶毋過台灣語文干焦國小佇咧教爾
iáu-m̄-koh Tâi-uân gí-bûn kan-ta kok-sió tī-leh kà niâ

甚至逐禮拜干焦一節
sīm-tsì ta̍k lé-pài kan-ta tsi̍t tsiat

兩个差欲二十外倍
nn̄g ê tsha beh jī-tsa̍p guā puē

根本都無合理
kin-pún to bô ha̍p-lí


*蔣為文副教授 成大台文系

這華語是照三頓
Tse Huâ-gí sī tsiàu sann tǹg

食 buffet 食到飽
tsia̍h bā-fé tsia̍h kàu pá

結果本土的台灣語文
kiat-kó pún-thóo ê Tâi-uân gí-bûn

一禮拜才食一頓爾
tsi̍t lé-pài tsiah tsia̍h tsi̍t tǹg niâ

各位啊
kok-uī ah

你若一禮拜食一頓
lí nā tsi̍t lé-pài tsia̍h tsi̍t tǹg

你會枵死抑袂
lí ē iau–sí iah bē?

*陳雪玉執行秘書 教育部國語會

未來阮會由國立教育研究院
Bī-lâi guán ē iû Kok-li̍p Kàu-io̍k Gián-kiù-īnn

in的課程研議團隊
in ê khò-thîng gián-gī thuân-tuī
閣去做一个研究
koh khì tsò tsi̍t ê gián-kiù

針對教育部的回應
Tsiam-tuì Kàu-io̍k-pōo ê huê-ìng

抗議團體真不滿
khòng-gī thuân-thé tsin put-buán

要求愛教育部長出面講清楚
iau-kiû ài Kàu-io̍k-pōo-tiúnn tshut-bīn kóng tshing-tshó

差一點仔引起衝突
tsha tsi̍t-tiám-á ín-khí tshiong-tu̍t

一場台灣語文的爭議
tsi̍t tiûnn Tâi-uân gí-bûn ê tsing-gī

猶原無法度煞
iû-guân bô-huat-tōo suah