2015年1月6日 星期二

鄭正煜---「台灣學教育」ê開山祖(作者:台灣南社 張復聚醫生)

圖片來源:柯巧俐

鄭正煜老師追思會按算2015年1月25日tī高雄市舉辦。

文章出處 : Babuza Chu 的貼文

台灣南社 張復聚醫生 18 Dec 2014

鄭正煜老師(1947-2014),tī 2014年國際人權日ê暗暝,離開伊ê至親、朋友、同志轉去西方樂園,hō͘咱無限ê m̄甘、艱苦、kap數念。


Kap鄭老師se̍k-sāi,是1996年。彼陣伊做陳光復立委ê助理。有一擺鄭老師招我去第4台(彼陣猶是地下電視台)討論台灣母語ê代誌,印象--裡,曾貴海醫師mā有在場。過無偌久,我koh去高雄市興中路建國黨辦公室開台語羅馬字ê課,鄭老師是辦公室主任,曾貴海醫師是南部負責人。就按呢,我開始認bat鄭老師。伊是退休老師(彼陣mā才50 thóng歲),對台灣教育真有意見:是啥代台灣囡仔讀ê冊lóng無台灣教材?後--來我才知,鄭老師已經teh處理台灣學基礎--「認識台灣」lah!對按呢開始,我對關心台灣語文ê議題放大到台灣教育。阮開始tī報紙雜誌、lajio͘h(廣播電台)kap電視台、街頭巷尾、立法院、教育部、真濟無仝ê場合寫文章、攑旗仔、giú布條,抗議、喝口號,就是beh爭取「母語教育」、「教育台灣化」等「台灣學教育」。

1997年,香港回歸中國,台灣回歸台灣。彼年,「認識台灣」地理、歷史、社會正式進入國中課程。這ê工程是足濟人做伙拍拚ê成果,暗中策畫ê靈魂人物就是鄭老師!

2000年,陳水扁當選總統,真濟朋友大歡喜,慶祝咱「出頭天」! 南部ê同志朋友感覺新政府mā是需要繼續支持kap監督。M̄才決定做伙組「台灣南社」。這中間鄭老師當然是靈魂人物。伊做2任執行長,後--來koh做2任社長。M̄-kú第二任做無了,因為身體bē勘--得。會使按呢講:南社若無鄭老師,所做ê事工會減80%!

鄭老師大約tī 1980年代就發現肝硬化(m̄是lim酒引起--ê),到 2001年hia發現肝癌,chhim開始無採用現代醫學治療,伊kah意另類療法:練氣功、食漢藥等。後--來,發現肝癌一粒一粒一直puh--出來,才去chhōe高雄榮總處理。南社ê醫生朋友kap榮總醫生mā有勸鄭老師換肝(肝臟移殖),M̄-kú鄭老師無接受。寶貴ê時間就kap性命按呢一點一滴ta̍uh-ta̍uh-á流對宇宙去!

雖然身體愈來愈soe-lám,鄭老師mā是繼續拍拚做教育台灣化ê事工。2008年馬政府上台了後,對本土教育愈來愈無重視,母語教育ê經費一直teh減少,對一年5千外萬一直減到chhun 2千萬。鄭老師認為無抗爭bē用--得。經過策畫kap協調,一大陣人 tī 2013年1月11日去教育部chhōe部長hoe, 差不多台灣本土語文學術界、運動界ê人攏總來ah!kan-taⁿ立委就有40外ê簽名連署,koh有國民黨--ê!教育部長蔣偉寧看著chiah濟人,大大chhoah一tiô,講這是伊做部長以來單一訴求上大ê場面!當面就答應咱ê訴求,kā母語教育經費回復到本底ê金額!了後,鄭老師mā是繼續koh要求本土語必修ê政策ài延長到國中;到尾仔,蔣部長已經有teh考慮beh採用,吩咐幕僚「兩案併陳」。

今年7--月,部長因為論文問題落台,換這馬ê吳思華部長,鄭老師開始煩惱!阮私下kún-sńg笑teh講,「思華」對咱不利,若是「思台」就足好!8月初8,濟濟台灣本土社團做伙開記者會,強烈要求吳部長ài執行國中本土語必修政策。Koh有,託管碧玲立委安排,8月22 tī管立委辦公室kap部長當面講白話,但是部長ê表現,hō͘ 阮足失望!

其實,彼ê時陣,鄭老師ê肝癌早就已經湠--開,對肝湠到肺部kap骨頭,chhām頷頸ê龍骨第3第4節mā已經chù-chhng!照講無應該按呢koh四界走chông!M̄-kú鄭老師照常beh出門拍拚!伊講「戰士著ài死tī戰場」!咱lóng知,頷頸是頭殼通身軀所有腦線(神經線)經過ê所在。這馬第3第4 節已經破chhè,若是koh有小可卡大ê動作來傷--著,比如雄雄斡頭、tǹg--tio̍h(像hāⁿ大步落樓梯)、跋倒、甚至是大力phah ka-chhiùⁿ、、,腦線ê傷害lóng會閣較厲害,致使大腦ê信號bē當經過腦線傳落去身軀逐所在,人隨時有bē當喘氣、心臟bē跳、內臟機能完全停止ê可能,危險性免講大家mā知!M̄-kú 鄭老師堅持beh去台北。我無法度拒絕,8月22 彼日beh出門進前,我kā伊家屬講,「這pái出門會拄著啥物狀況,無人料想會tio̍h。若是恁同意鄭老師出門,恁ài授權hō͘我,若有狀況,我有權利處理,不管結局按怎,恁ài信用我。」家屬同意了後,我kap鄭老師對in兜叫計程車去坐高鐵、到台北車頭落車、好禮仔行路過地下廣場出去坐計程車去管立委辦公室、、、。這,對咱正常人是極其普通ê代誌,親像桌頂ni柑;但是對鄭老師是足困難、足危險,袂當有一屑仔走chhoa̍h ê大工程! 若有淡薄仔失覺察,可能ê後果是隨時一命烏呼哀哉! 伊彼當時鄭老師就哪像是風颱暝中ê一pha蠟燭火,隨時會hoa--去!我ê壓力?袂曉講ê大重。

就按呢,對早起10點外出門,一直到暗時6點外,鄭老師為著「國中本土語國中必修」,南北奔波8點外鐘!這中間,無啥物歇睏、頷頸kho͘保護箍、忍耐骨頭疼痛、m̄成食、行路足細膩、講話mā袂當連紲siuⁿ久、、、。好佳哉!託佛祖、天公伯、kap上帝ê 保庇,平安轉來到厝!彼款心理負擔,語言袂曉講、文字袂曉寫!

11月29九合一選舉,民進黨大贏;開票彼暝,鄭老師kap我通電話,伊足歡喜!電話中,一直kā我交代:請民進黨執政縣市召開「本土教育聯席會」,討論按怎進行包含母語教育、教育台灣化等「台灣學教育」ê 相關議題。

2年前鄭老師kap何信翰教授有得著蔡主席同意,這款會lóng總共開3 pái,m̄-kú 後--來sòa無hoeh無bóe。鄭老師ê解說是,當時咱才有6縣市nā-tiāⁿ,力頭無夠飽;這馬有13縣市,ài要求民進黨出食奶仔力來做!這項代誌,12月14蔡英文、陳菊、潘孟安鬥陣來kā鄭老師拈香時,我有拜託鄭老師ê後生鄭原真代表報告,蔡主席mā當場答應。

其實對7月份起,kan-taⁿ癌痛就hō͘鄭老師足痛苦!癌症造成ê疼痛,無拄--過ê人bē當理解kap感受。我看伊按呢痛,影響睏眠kap食慾,就紹介高醫疼痛科朱醫生醫治。朱醫生醫術高明,果然「藥到痛除」,鄭老師歡喜到bē曉講,特別敲電話kā我chhiàng講,「我ê痛減少80pha,koh會當行路60公尺去菜市仔,”吃大餐”(華語),足感謝!」我mā敲電話kā朱醫生說謝。但是,基本ê問題無解決,好光景無久,koh來就真緊繼續惡化,到8月底對台北轉--來了後,就無koh再出門!過往前2禮拜,會使講lóng無啥lim食,人mā開始淡薄仔精神恍惚,講話有時bē對tâng。上尾仔彼禮拜,我kap韓明榮醫生大約1日去探望1、2擺,韓醫生kā吊大筒--ê(打點滴),加減補充水分kap糖分。12月初8暗時,因為實在tī厝內照顧真正無方便,得著鄭老師同意(進前伊已經有決定無beh去tòa病院),送入高雄市民生病院,當時伊意識已經m̄是清楚lah。隔轉日,陳菊市長去探望,菊姊phak tī鄭老師ê耳孔邊kā安慰,鄭老師目睭無thí開,m̄-kú 目屎對目尾sûi--落來。 12月初10國際人權日暗時6點40分,醫生宣布死亡!鄭老師信任ê佛祖選人權日來o-ló、肯定伊對台灣人母語人權ê拍拚!

因為過去教育ê關係,鄭老師一開始mā認定台語就是中國閩南語,台語文lóng會當對中國古冊,包含康熙字典,chhōe著適當ê漢字來寫。但是聽我khau破分析了後,了解台語koh有原住民語、英語、日語、荷蘭語、西班牙語kap可能是百越語ê成分,真緊就修正想法,koh會當接受羅馬字lām漢字ê方式寫台語文。2006年教育部通過台羅方案,南社tī後壁有出力。講著教育部眼時前採用「閩南語」這ê名詞,伊按呢講:「咱暫時忍耐, 但是後擺咱一定beh kā改轉來台語!」

鄭老師做台灣學ê態度是「永遠無放棄」,信念是「教育是上軟性koh上強勢ê建國工程」。伊ê話母是「hit-lō koh」、「這馬情形是按呢」。

鄭老師一生上要意ê代誌是:教育台灣化、反對選舉買票、反對媒體hō͘少數人控制kap救陳水扁總統--南社認定馬總統對阿扁總統政治迫害!

用按呢數念我敬愛ê建國前輩--鄭正煜老師。