2012年2月15日 星期三

【看世事講台語】龍一尾 較贏過杜蚓一畚箕



編輯 / 李江却台語文教基金會 陳豐惠 劉承賢、黃能揚


標題:公務員留職停薪 七成育囝做原因
Kong-bū-uân liû-tsit thîng-sin, tshit siânn io-kiánn tsò guân-in.
(華語)公務員留職停薪 近7成為育嬰


標題:公務員育囝 留職停薪人額增加
Kong-bū-uân io-kiánn, liû-tsit thîng-sin lâng-gia̍h tsing-ka.
(華語)公務員育嬰 申請留職停薪者增


標題:希望囝相龍 留職停薪育囝搶做前
Hi-bāng kiánn siùnn lîng, liû-tsit thîng-sin io-kiánn tshiúnn tsò-tsîng.
(華語)龍年生育潮 育嬰留職停薪者續


諺語:龍一尾,較贏過杜蚓一畚箕。

Liông tsi̍t bué, khah iânn kuè tōo-kún tsi̍t pùn-ki.

漢文化kā龍看做是好吉兆,龍嘛是皇帝ê象徵(ting),tsit句諺語意思是講,一个gâu人,較贏一大陣無才調ê人。因為對龍ê這款觀念,真濟台灣人極愛佇龍年生囝,毋過,囡仔ê未來,上重要–ê嘛是出世了後咱按怎kā牽教,干焦相龍,並無一定就會有出脫。
 
做公務員的莊小姐


Tsò kong-bū-uân ê Tsng sió-tsiá

目前有身 七個外月

bo̍k-tsîng ū-sin tshit kò guā gue̍h

因為生產了後

in-uī sing-sán liáu-āu

想欲飼母奶

siūnn-beh tshī bó-ling

伊閣袂放心kā囡仔交予奶母照顧

i koh bē hòng-sim kā gín-á kau hōo ni-bó tsiàu-kòo

所以產後按算申請育囝假

sóo-í sán āu àn-sǹg sin-tshíng io-kiánn-ká



北市社會局公務員 莊小姐

我就是向奶母這爿去揣
Guá tō-sī ǹg ni-bó tsit pîng khì tshuē

毋過,奶母若講我揣來揣去
m̄-koh, ni-bó nā kóng guá tshuē lâi tshuē khì

攏揣無適合的
lóng tshuē bô sik-ha̍p–ê

我可能就會家己tshuā
guá khó-lîng tō ē ka-kī tshuā



佮莊小姐仝款
Kap Tsng sió-tsiá kâng-khuán

想欲佇龍年生囡仔的公務員袂少
siūnn-beh tī lîng-nî senn gín-á ê kong-bū-uân bē-tsió

就提台北市政府社會局來講
tō the̍h Tâi-pak Tshī-tsìng-hú Siā-huē-kio̍k lâi kóng

員工大約一千四百人
uân-kang tāi-iok tsi̍t-tshing-sì-pah lâng

最近一年就七十六个紅嬰仔出世
tsuè-kīn tsi̍t nî tō tshit-tsa̍p-la̍k ê âng-enn-á tshut-sì

是市府生育率上高的局處單位
sī Tshī-hú sing-io̍k-lu̍t siōng kuân ê kio̍k-tshù tan-uī



北市府社會局人事室主任 彭艷珠

舊年佮今年有身的 加起來攏總
Kū-nî kap kin-nî ū-sin–ê ka–khí-lâi lóng-tsóng

有身佮生囝的攏總有76个人
ū-sin kap senn-kiánn–ê lóng-tsóng ū tshit-tsa̍p-la̍k ê lâng

已經生28个
í-king senn jī-tsa̍p-peh ê

目前準備欲生的有48个將近50个
bo̍k-tsîng tsún-pī beh senn–ê ū sì-tsa̍p-peh ê tsiong-kīn gōo-tsa̍p ê

這佇各局處內底算是上濟的
tse tī kok kio̍k-tshù lāi-té sǹg sī siōng-tsē–ê


除了生育率衝懸
Tû-liáu sing-io̍k-lu̍t tshìng kuân

需要佇咧厝內照顧囡仔的人
su-iàu tī-leh tshù-lāi tsiàu-kòo gín-á ê lâng

嘛愈來愈濟
mā jú-lâi-jú tsē

根據銓敘部的統計
kun-kù Tshuân-sū-pōo ê thóng-kè

全國27萬公務員內底
tsuân-kok jī-tsa̍p-tshit-bān kong-bū-uân lāi-té

民國98年申請留職停薪的人數
bîn-kok káu-tsa̍p-peh nî sin-tshíng lâu-tsit-thîng-sin ê lâng-sòo

干焦1271人
kan-ta tsi̍t-tshing nn̄g-pah tshit-tsa̍p-it lâng

毋過到舊年
m̄-koh kàu kū-nî

一睏來到2227人
tsi̍t-khùn lâi-kàu nn̄g-tshing nn̄g-pah jī-tsa̍p-tshit nî

加千外人
ke tshing-guā lâng

其中顧囡仔
kî-tiong kòo gín-á

停職的有六成八遐懸
thîng-tsit–ê ū la̍k-siânn-peh hiah kuân

女性的申請者是男性的三倍
lú-sìng ê sin-tshíng-tsiá sī lâm-sìng ê sann puē

而且 今年拄仔好是龍年
jî-tshiánn kin-nî tú-á-hó sī lîng-nî

預估生育率會閣再提懸
ū-kóo sing-io̍k-lu̍t ē koh-tsài the̍h-kuân

育囝留職停薪的嘛定著會閣增加
io-kiánn lâu-tsit-thîng-sin–ê mā tiānn-tio̍h ē koh tsing-ka.