2011年6月22日 星期三

【看世事講台語】三塊豆乾跳過桌



台語編輯 / 李江却台語文教基金會


標題:台商做中國透仔 法院裁准收押
華語:台商為中收集情資 檢調聲押獲准
Tâi-siong tsò Tiong-kok thàu-á, huat-īnn tshâi-tsún siu-ah.

註:透仔 (thàu-á) :間諜


標題:願做中國抓耙仔 轉來台灣隨受掠
華語:台商涉為中收集情資 返台遭逮捕
Guān tsò Tiong-kok jiàu-pê-á, tńg lâi Tâi-uân suî siū-lia̍h.


標題:高級軍官 hông 吸收?軍方講無影
華語:我高階軍官被中吸收?軍方否認
Ko-kip kun-kuann hông khip-siu? Kun-hong kóng bô-iánn
 
 
諺語:三塊豆乾跳過桌

Sann tè tāu-kuann thiàu kuè toh.

華語:『見利忘義』。

中國為著欲佔台灣,用利益 siânn 人替伊收集情報。毋過,為著金錢,煞來出賣家己ê國家kap同胞,就親像俗語咧講,是「三塊豆乾跳過桌」ê 行為,sian 毋通!
 
有一个台商佇咧中國工作的時陣

Ū tsi̍t ê Tâi-siong tī-leh Tiong-kok kang-tsok ê sî-tsūn

去予中國吸收
khì hōo Tiong-kok khip-siu

轉來台灣了後
tńg–lâi Tâi-uân liáu-āu

佮伊的高中同學
kap i ê ko-tiong tông-ha̍k

這馬佇飛彈指揮部任職的曹姓軍官來連絡
tsit-má tī Hui-tuânn Tsí-hui-pōo jīm-tsit ê Tsô sènn kun-kuann lâi liân-lo̍k

希望提著包括「愛國者」
hi-bāng the̍h-tio̍h pau-kuat “Ài-kok-tsiá”

等等的軍事機密
tíng-tíng ê kun-sū ki-bi̍t

這个軍官誠敏感
tsit ê kun-kuann tsiânn bín-kám

隨共伊的頂司回報
suî kā i ê tíng-si huê-pò

國防單位嘛隨展開
kok-hông tan-uī mā suî tián-khui

反情報的行動
huán-tsîng-pò ê hîng-tōng

就隨掌握著明確的犯罪事證
tō suî tsiáng-ak tio̍h bîng-khak ê huān-tsuē sū-tsìng

毋過因為賴坤玠毋是現任的軍人
m̄-koh in-uī Luā Khun-kài m̄-sī hiān-jīm ê kun-jîn

所以國防部函請國防單位繼續偵辦
sóo-í Kok-hông-pōo hâm-tshiánn kok-hông tan-uī kè-siok tsing-pān

佇咧嚴密的監控一年外了後
tī-leh giâm-bi̍t ê kàm-khòng tsi̍t nî guā liáu-āu

趁這个台商轉來台灣的時陣
thàn tsit ê Tâi-siong tńg-lâi Tâi-uân ê sî-tsūn

才共伊掠–起-來
tsiah kā i lia̍h–khí-lâi

閣共台灣高等法院申請收押
koh kā Tâi-uân Ko-tíng Huat-īnn sin-tshíng siu-ah

得著允准
tit-tio̍h ún-tsún

*陳晴教 台灣高等法院發言人

阮高院的合議庭
Guán Ko-īnn ê ha̍p-gī-tîng

昨昏下晡開羈押庭
tsa-hng e-poo khui ki-ah-tîng

問過被告了後
mn̄g kuè pī-kò liáu-āu

認為被告犯罪嫌疑真重
jīn-uî pī-kò huān-tsuē hiâm-gî tsin tāng

也有合刑事訴訟法羈押的要件
iā-ū ha̍h Hîng-sū-sòo-siōng-huat ê iàu-kiānn

所以佇昨昏
sóo-í tī tsa-hng

也就是六月十三的下晡
iā tō-sī la̍k gue̍h tsa̍p-sann ê e-poo

裁定被告賴坤玠應當羈押
tshâi-tīng pī-kò Luā Khun-kài ìng-tong ki-ah

根據瞭解
Kun-kù liáu-kái

賴坤玠佇咧偵訊的時陣
Luā Khun-kài tī-leh tsing-sìn ê sî-tsūn

有講著捌聽過對岸情報人員共伊講過
ū kóng-tio̍h bat thiann-kuè tuì-huānn tsîng-pò jîn-uân kā i kóng–kuè

有咱這爿高層的軍官去予in吸收
ū lán tsit pîng ko-tsân ê kun-kuann khì hōo in khip-siu

毋過國防部對這表示否認
m̄-koh Kok-hông-pōo tuì tse piáu-sī hónn-jīn

*羅紹和 國防部發言人

第一
Tē-it

無任何的將士牽磕這个案
bô jīm-hô ê tsiòng-sū khan-kha̍p tsit ê àn

第二
Tē-jī

嘛無任何的機密資料漏–出-去
mā bô jīm-hô ê ki-bi̍t tsu-liāu lāu–tshut-khì

雖罔這个案件
Sui-bóng tsit ê àn-kiānn

到目前為止
kàu bo̍k-tsîng uî-tsí

猶無軍人沐–著
iáu bô kun-jîn bak–tio̍h

毋過檢調人員
m̄-koh kiám-tiāu jîn-uân

猶是繼續追查
iáu-sī kè-siok tui-tsa

希望查清楚
hi-bāng tshâ tshing-tshó

敢有其他共犯
kám-ū kî-tha kiōng-huān

抑是接近的人士
ia̍h-sī tsiap-kīn ê jîn-sū