落實國家語言發展法
支持專業同步通譯制度化
9/29記者會簡要記錄
發起單位／李江却台語文教基金會
時間／2021/9/29（拜三）10 : 00
地點／立法院正門口（台北市中山南路1號）
記錄／張翠硯
2021年9月27，是立法院開始提供「語言通譯」ê頭一工。台灣基進黨立法委員陳柏惟，用台語質詢國防部長邱國正，部長suah拒絕透過聽專業華語口譯來進行，反倒tńg來要求陳立委ài講華語。
【落實國家語言發展法 支持專業同步通譯制度化】ê記者會由「李江却台語文教基金會」發起，招濟濟民間團體，9月29早起tī立法院門口huah口號、開記者會。逐家為著各族群ê語言權，uì台灣各地來到tsia。記者會由陳豐惠執行長tshuā頭，伊強調「語言通譯」ê重要性，是hōo逐家lóng有自由使用各種語言ê權利，beh達成tsit个目標，mā ài積極培養通譯人才。雖bóng目前立法院kan-na有台語、客語ê通譯，m̄-koh，原住民各族ê語言，mā仝款ài重視，國會應該分階段建置原住民各族語ê通譯制度。
民間團體代表對事件ê看法kap訴求：
台灣母語聯盟
李勤岸理事：
類似ê情形，以早就bat發生--過，lán若是無處理，就ē koh再發生，通譯lán做ē到，是beh做m̄做niâ。Lán tio̍h-ài認清台灣是多元族群ê社會，照台灣ê國家資源來講，beh提供完整ê翻譯，應該無hiah困難。透過通譯準確ê表達，mā ē-tàng hōo逐家khah有時間thang冷靜思考，bē出現冤家sio拍ê畫面。
台南說唱藝術工作室
「台南妹仔教你講台語」面冊社群
周佳穎：
講母語是lán ê基本人權、多元文化是台灣ê重要價值。Lán ài互相尊重無仝ê語言文化，政府ài來遵守「國家語言平等法」，做伙來thui-sak本土語言。Ǹg望序大ài kap厝內序細講母語，lán ài kā母語khioh--tńg--來。語言m̄-nā是溝通ê工具，mā是lán族群ê靈魂kap精神。
台灣社
李川信社長：
質詢國防部長是真致重ê代誌，陳立委mā無要求部長ài用台語回應。《國家語言發展法》已經通過，任何一个官員tio̍h-ài遵守，各種場合lóng ài有翻譯設備。長久以來，獨尊華語做唯一ê官方語言，tse是無妥當ê做法，應該ài落實語言ê轉型正義。Lán ài鼓勵少年ê政治工作者用母語來表達in ê聲音。
「牽囡仔ê手，行台語ê路」面冊社群
董力玄：
阮真歡喜看著立法院開始提供語言通譯ê服務，tse對起造一个語言平等ê社會，是關鍵ê一步。M̄-nā是政府官員，tī阮共學團體thui-sak台語ê過程，mā發見大眾普遍真欠缺「多元語言」ê意識。可能真濟政府官員ē認為，「語言」是文化部ê代誌，m̄-koh，tse應該是各部門ài互相配合tsiah tio̍h。阮逐家真拚勢tī華語強勢ê生活中kap囡仔講台語，阮mā期待社會ē-tàng有koh-khah開闊ê空間thang使用本土語言。Hōo母語囡仔m̄管tī厝內、公開場合iah是立法院，lóng ē-tàng聽著家己ê語言。除了制度kap設備，mā ài tuì改變心態kap觀念開始，培養對本土語言ê認同kap意識。
台文筆會
陳明仁理事：
「語言」是人類kap別个物種做區別ê優勢，重點是表達。別人若是聽無，現代科技lóng ē-tàng tàu-sann-kāng。每一个人lóng ē-tàng用伊上kah意、上gâu ê語言來表達。各族群ê民意代表，上重要--ê，就是替in ê族群講話。民意代表有義務，ài滿足各族群ê需要。
台灣原住民族政策協會
Yapasuyongu Akuyana（陳旻園）理事長：Nga’ay ho , salikaka mapolong.台灣有真濟族群，kan-na原住民就有超過16族、語言有超過20種。目前立法院iáu無原住民語言ê通譯。阮tng-leh拍拚，少年人mā leh拍拚kā母語學--tńg--來，過去ê「國語政策、同化政策」hōo母語tī厝內消失--去。「母語tī厝內學」tsit款講法，對阮是真大ê傷害。阮ǹg望《國家語言發展法》ē-tàng hōo阮講母語免koh ng-ng-iap-iap、感覺家己khah低級。阮beh強調，族群kan-na有差別、無kuân低之分。
台灣教授協會
陳文成紀念基金會
陳俐甫教授：
《國家語言發展法》是立法院通過ê法律，若in家己通過ê法律，就無法度tī立法院執行，án-ne法律是beh訂來騙啥人--leh？Lán beh按怎相信tsit个國家ê體制？兩冬前，台灣大學ê合作社校務會議，無愛hōo學生用台語發言，就算政府部門願意派通譯人員來翻譯，台灣大學終其尾iáu是決議kan-na ē-tàng用北京語開會。可見類似ê代誌，tuì校園事件到立法院，lóng無改變。Tse重點是公務人員應該ài守法、法律ài落實，m̄是單純冤家sio拍ê問題。
「做伙來講台語、sńg kah 烏 mà-mà 好無？」協會
郭潤庭執行長：
阮是一陣kap囡仔講台語ê家庭發起ê團體。阮感覺一个人tī家己ê土地，就算kan-na ē-hiáu講母語，mā應該ài ē-tàng tī tsit个社會生活、徛起。M̄-koh，實際上真困難，連協會進前beh申請一个台文ê銀行口座，mā舞tsiok久。邱部長對「講母語」無友善，he是過去政策造成ê問題。而且，語言其實mā是lán真重要ê國防元素。政策以外，就是生活中ài來講爸母話，ǹg望阮ê囡仔，就算bē-hiáu中國話mā ē-tàng平安、快樂大漢。
台灣獨立建國聯盟
何浩明祕書長：
語言是人權、是態度、是尊嚴。對真濟民眾來講，in ê母語無一定是華語，用母語發言hōo koh-khah濟人ē-tàng了解政策，tse本底應當是真值得歡喜ê代誌。Tī事件發生了後，立法院suah講beh暫停通譯服務，阮認為部會應該ài檢討tsit个決定、ài koh-khah大力來thui-sak hōo語言平等ê通譯tsiah tio̍h。
意傳科技
蔡文莉負責人：
(台語) 逐家好。
(Pangcah) Nga'ay ho, ci Bûn-lī no Ì-thuân kako.
(Truku) Embiyax su hug?
(Hakka) Tai gaˊ hoˋ, ngaiˇ he Bûn-lī.
（大家好，𠊎係文莉。）
(Hakka) Ngaiˇ deuˊ hiˊ mong ziin fuˋ gienˊ ciiˇ haˊ hi，
（𠊎兜希望政府堅持下去，）
gienˊ ciiˇ guedˋ gaˊ ngiˊ ngienˇ zii tu fa.
（堅持國家語言制度化。）
(Hakka) Anˋ ziiˋ se. Siin mung.
（恁仔細。承蒙。）
(Pangcah) Aray.
(Truku) Mhuway su balay.
(台語) 感謝！
記者會上尾由李江却台語文教基金會ê陳豐惠執行長tshuā逐家koh再huah口號「國家語言落實，國會代先做起」，mā ǹg望逐家做伙拍拚，一定ài hōo通譯制度趕緊來恢復、落實。
出席記者會名單：
李江却台語文教基金會
台灣羅馬字協會
台灣母語聯盟
台北市台灣語協會
台文筆會
台越文化協會
台灣原住民族政策協會
台灣原社
董事長樂團
意傳科技
台灣教授協會
台灣社
台灣北社
台灣教師聯盟
台灣南社
台灣獨立建國聯盟
台灣人權促進會
台北水噹噹姊妹聯盟
公投護台灣聯盟
陳文成紀念基金會
鄭南榕基金會
「做伙來講台語、sńg kah 烏 mà-mà 好無？」協會
樂暢親子共學空間
台南說唱藝術工作室
「台南妹仔教你講台語」面冊社群
「牽囡仔ê 手，行台語 ê 路」面冊社群
新竹市母語推廣協會
台語路—台語囡仔共學團
台語路—大人囡仔鬥陣行共學團
桃仔園台語囡仔共學團
贊聲名單（無派代表出席記者會）：
台灣中社
台灣客社
台灣東社
台語路親子樂團
板橋囡仔共學團
三峽北大台語囡仔伴
台大台語文社
鄭福田文教基金會
客家後生社
國立成功大學台灣文學系台語師資班
國立成功大學台灣語文測驗中心
國立成功大學越南研究中心
------歡迎捐款贊助------
歡迎捐款贊助 #李江却台語文教基金會 （捐款可抵稅，匯款後請通知02-23112199）
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
沒有留言:
張貼留言
注意：只有此網誌的成員可以留言。