白話字檢定是族語釘根的起步

◎陳豐惠

最近『吾思華，不思台』的教育部決議十二年國教課綱「國中本土語言維持選修」，hō͘台灣母語復興運動者的「國小本土語言必修一節延伸到中學」的卑微寄望破碎，有志大家感覺真鬱卒；幾工前koh有立委「毋捌字兼無衛生」公開講佇學校教母語會「破壞民族情感」，實在hō͘人懷疑伊活tī佗一世紀？

聯合國教科文組織毋但一擺呼籲應該tī正式教育實施多語（家己ê族語以外，嘛需要學習其他族群ê族語至少一種kap外國語言），多語會幫贊智力開發，提升創造力，甚至佇1999年koh訂2月21做「世界母語日」，呼籲各族群注重kap傳承家己ê母語，千萬m̄-thang hō͘族語滅絕，造成世界文化資產ê喪失。

長老教會總會台灣族群母語推行委員會十外冬來為欲復興各族群母語，除了舉辦各種母語活動、發行母語出版品以外，koh定期舉辦「白話字中級檢定」（檢定書寫能力），就是認定白話字是族語釘根的起步，雖罔提著檢定證書「無趁湯，無趁粒」，無啥物「利頭」，但是透過檢定，咱thang有學習、研討的過程，咱thang較認捌咱的族語kap文化，加強咱的自信kap主體性；上重要的是，咱thang替世界文明保存文化資產，咱確信：台灣各族群母語是上主賞賜的寶貝！

今年度白話字中級檢定招李江却台語文教基金會、台灣羅馬字協會、台灣南社、台中大千電台協辦，按算2014/11/9禮拜日下晡一點佇台北、台中、高雄舉行。若有教會兄姊超過五位以上欲集體報名，嘛thang特別佇教會設考場。2015年起，會增加定期ê白話字中級檢定，koh有beh加舉辦白話字初級檢定，希望鼓舞較濟兄姊投入語言文化復興事工。關係2014/11/9報名詳細狀況請看網站：http://ppt.cc/XwBo。

（文章轉載自：《台灣教會公報》）

http://www.tcnn.org.tw/news-detail.php?nid=8161#
-------
2015/10/20更新資訊
2015年「台語白話字檢定」由台灣語文測驗中心辦理，2015年12月5日舉行。

▶▶▶來去 台灣語文測驗中心

-------