【走馬燈】7/21王玉川開講 「人生尾站ê代誌」

「山中自有千年樹，世間難得百歲人」，自古以來，lán台灣人對人生尾站ê代誌就真對重（tùi-tiōng），厚禮儀，厚khiàn-sńg，厚所費，因為tse是人生上尾一擺，上kài重要ê大代誌。

    Tuì一病不起開始，lán就求醫問卜，無藥醫就來搬鋪，做司公（sai-kong），做旬，百日，對年，三年，徛靈，除靈等等，ē-sái講是「司公陣陣出，盡bat是半仙」，無--lah！盡bat是司公。

    現時社會變化真大，lán將現代化ê後事交hō͘葬儀社，免一個月就清氣溜溜，m̄管你是m̄是kah意，in就是án-ne kā lán料理。

    Tī lán iáu未hō͘人料理前進，你若有閒，有心情，koh想beh知影過去ê台灣人按怎hō͘人料理，李江却台語文教基金會beh邀請王玉川先生來開講，開講古早台灣人人生尾站ê代誌，請你來聽，請你來開講，免錢。

    王玉川先生是唸歌走唱ê吟遊藝人，mā bat做過司公tsit途（王半仙？），幾年前，lán bat邀請伊來開講各行各業ê江湖僻話，tsit遍lán請伊來講按怎kā人料理。

    你若有閒，有心情，koh想beh知影過去ê台灣人按怎hō͘人料理，guán誠懇邀請你來。

時間：7/21（拜一）暗時七點半到九點半，地點：台北市萬華區中華路一段106號9樓。電話：02-2311-2199。