2012年7月19日 星期四

【看世事講台語】一字入公門,九牛拖袂出。



編輯 / 黃能揚、李江却台語文教基金會 陳豐惠 劉承賢


標題:法院作業脫箠 一件妨礙自由判兩回
Huat-īnn tsok-gia̍p thut-tshuê, tsi̍t kiānn hông-gāi tsū-iû phuànn nn̄g huê.
(華語)法院作業疏失 妨礙自由案一案兩判

標題:稅厝交繚相告 兩份判決書起花kô
Suè-tshù kau-liâu sio-kò, nn̄g hūn phuànn-kuat-su khí-hue-kô.
(華語)租賃糾紛告上法院 同一案2判決書?

註解:
交繚 (kau-liâu):tsia是「糾紛」ê意思。
花kô (hue-kô):「混亂」。


標題:書記官.檢察官.法院 攏看無周至
Su-kì-kuann, kiám-tshat-kuann, huat-īnn, lóng khuànn bô tsiu-tsì.
(華語)書記官.檢座.法院 一路疏失鬧烏龍


諺語:一字入公門,九牛拖袂出。

Tsi̍t jī ji̍p kong-mn̂g, káu gû thua bē tshut.

這句諺語意思是講:訴訟ê文書真慎重,若寫- -落,就oh得改。毋過,這條新聞煞有這款一个案件出兩份判決書,而且欲撤去一份ê情形,對tsia咱thang知,法院嘛是人咧扞- -ê,koh-khah按怎斟酌、細膩,嘛是袂免得會失覺察、脫箠。


這塊佇台中市中港路黃金地段的土地

Tsit tè tī Tâi-tiong-tshī Tiong-káng-lōo n̂g-kim tē-tuānn ê thóo-tē

兩爿攏是真麗倒的厝
Nn̄g-pîng lóng-sī tsin lè-táu ê tshù

地主因為佮承租戶的租約糾紛
Tē-tsú in-uī kap sing-tsoo-hōo ê tsoo-iok kiù-hun

去予姓柯的承租戶
Khì hōo sènn Kua ê sing-tsoo-hōo

以妨礙自由告到法院去
Í hóng-gāi tsū-iû kò kàu Huat-īnn- -khì

被告的地主不服一審的判決上訴
Pī-kò ê tē-tsú put-ho̍k it-sím ê phuànn-kuat siōng-sòo

無想到四十工了後
Bô siūnn-kàu sì-tsa̍p kang liáu-āu

仝一个案件
Kāng tsi̍t-ê àn-kiānn

煞收著完全無仝款的判決書
Suah siu-tio̍h uân-tsuân bô-kāng-khuán ê phuànn-kuat-su


地主 廖金水

(第一擺)判決結果
(Tē-it pái)phuànn-kuat kiat-kó

罰五千到六千塊
Hua̍t goo-tshing kàu la̍k-tshing khoo

第二擺(判決)阮看著閣較愣去
Tē-jī pái(phuànn-kuat)guán khuànn- -tio̍h koh-khah gāng- -khì

哪會變做
Ná-ē piàn-tsò

罰兩萬箍 拘役20工(換算的結果)
Hua̍t nn̄g-bān khoo, khu-i̍k jī-tsa̍p kang(uānn-sǹg ê kiat-kó)

哪會「司法像月娘,初一十五無仝樣」
Ná-ē “Su-huat tshiūnn gue̍h-niû, tshe-it tsa̍p-gōo bô-kāng-iūnn”


這个一案判兩擺的譀古
Tsit-ê tsi̍t àn phuànn nn̄g-pái ê hàm-kóo

問題就出佇姓高的女書記官
Būn-tê tsiū tshut tī sènn Ko ê lú su-kì-kuann

文書作業的疏忽
Bûn-su tsok-gia̍p ê soo-hut

袂記得kā移審的資料
Bē-kì-tit kā î-sím ê tsu-liāu

輸入電腦內底
Su-ji̍p tiān-náu lāi-té
仝一案件送兩擺
Kâng tsi̍t àn-kiānn sàng nn̄g-pái

姓林的承辦檢察官嘛無發見
Sènn Lîm ê sîng-pān kiám-tshat-kuann mā bô huat-kiàn

造成檢方向法院重覆起訴
Tsō-sîng kiám-hong hiòng Huat-īnn tiōng-ho̍k khí-sòo

因為前一个案已經結案
In-uī tsîng tsi̍t-ê àn í-king kiat-àn

台中地方法院嘛無發見檢方送兩擺
Tâi-tiong Tē-hng Huat-īnn mā bô huat-kiàn kiám-hong sàng nn̄g-pái

院檢對造成民眾的不安表示坐毋著
Īnn Kiám tuì tsō-sîng bîn-tsiòng ê put-an piáu-sī tshē m̄-tio̍h


台中地檢襄閱主任檢察官 吳祚延

資料輸入的時陣
Tsu-liāu su-ji̍p ê sî-tsūn

(書記官)袂記得kā已經送審的資料
(su-kì-kuann)bē-kì-tit kā í-king sàng-sím ê tsu-liāu

Key-in到電腦內底
Khí-ín kàu tiān-náu lāi-té

致使管制上出現落差
Tì-sú kuán-tsè siōng tshut-hiān lo̍h-tsha

按呢的失覺察
Án-ne ê sit-kak-tshat

造成當事人不便
Tsō-sîng tong-sū-jîn put-piān

實在真失禮
Si̍t-tsāi tsin sit-lé


台中地院襄閱庭長 林三元

佇前案記錄
Tī tsîng àn kì-lo̍k

無查清楚
Bô tshâ tshing-tshó

致使仝一案
Tì-sú kâng tsi̍t àn

做兩擺判決
Tsò nn̄g-pái phuànn-kuat

當事人名聲的受損
Tong-sū-jîn miâ-siann ê siū-sńg

也影響著司法的威信
Iā íng-hióng tio̍h su-huat ê ui-sìn

對這部分
Tuì tsit pōo-hūn

本院表示真對不住
Pún īnn piáu-sī tsin tuì-put-tsū


一个案判兩擺
Tsit-ê àn phuànn nn̄g-pái

台中地方法院表示
Tâi-tiong Tē-hng Huat-īnn piáu-sī

第二擺判決是違法判決
Tē-jī pái phuànn-kuat sī uî-huat phuànn-kuat

會kā伊撤銷
Ē kā i thiat-siau

犯錯的檢察官佮書記官
Huān-tshò ê kiám-tshat-kuann kap su-kì-kuann

嘛照相關的規定來處分
Mā tsiàu siong-kuan ê kui-tīng lâi tshú-hun

毋過對仝一个妨礙自由的案件
M̄-koh tuì kāng tsi̍t-ê hóng-gāi tsū-iû ê àn-kiānn

六千箍的罰金佮拘役20工的判決
La̍k-tshing khoo ê hua̍t-kim kap khu-i̍k jī-tsa̍p kang ê phuànn-kuat

有影差大碼
Ū-iánn tsha tuā-bé

嘛莫怪被告會質疑
Mā bo̍k-kuài pī-kò ē tsit-gî

法院的判決標準到底是按怎
Huat-īnn ê phuànn-kuat phiau-tsún tàu-té sī án-tsuánn

沒有留言:

張貼留言

注意:只有此網誌的成員可以留言。

台文通訊BONG報

台文通訊BONG報 https://tsbp.tgb.org.tw