2012年5月4日 星期五

【看世事講台語】一年出一个文狀元,一年出無一个戲狀元


編輯 / 黃能揚、李江却台語文教基金會 陳豐惠 劉承賢


標題:經典劇本重閣斟酌 改做台語新劇
King-tián ki̍k-pún tîng koh tsim-tsiok, kái-tsò Tâi-gí sin-kio̍k.
(華語)經典作品改編 台語"海鷗"新詮釋
註:新劇:『舞台劇』。


標題:經典重改寫 “海雞母”唱台語歌
King-tián tîng kái-siá, “hái-ke-bó” tshiùnn Tâi-gí-kua.
(華語)經典作品改編 "海鷗"唱台語歌謠


標題:藝文發展欲齊全 政府贊助愛有按算
Gē-bûn huat-tián beh tsiâu-tsn̂g, tsìng-hú tsàn-tsōo ài ū àn-sǹg.
(華語)健全藝文發展 政府扶植需有計畫


諺語:一年出一个文狀元,一年出無一个戲狀元。

Tsi̍t nî tshut tsi̍t ê bûn-tsiōng-guân, tsi̍t nî tshut bô tsi̍t ê hì-tsiōng-guân.

好ê演員無hiah好培養,十冬都無一定就會出一个出擢(tshut-tioh)ê演員。演員都按呢- -ah,戲班(戲團)閣較免講。支持舞台藝術,需要有計畫加上長期投入,咱希望台灣ê新劇,會當愈來愈興,變做閣一个台灣之光。

註:出擢(tshut-tioh):華語『出色、傑出』。


燈光效果

Ting-kng hāu-kó

表達主角充滿衝突的情緒
Piáu-ta̍t tsú-kak tshiong-muá tshiong-tu̍t ê tsîng-sū

另外閣有台語老歌
Līng-guā koh-ū Tâi-gí lāu-kua

予內心戲更加精采
Hōo lāi-sim-hì kìng-ka tsing-tshái


(男演員唱)

我滿腹的恨火
Guá muá-pak ê hūn-hué

啊~啊~
Ah, ah

今夜又是
Kim-iā iū-sī


這遍台南人劇團
Tsit piàn Tâi-lâm-lâng ki̍k-thuân

改編露西亞作家Anton Chekhov(『安東.契科夫』)的作品「海鷗」
Kái-pian Lōo-se-a tsok-ka Anton Chekhov ê tsok-phín “Hái-au”

除了規齣戲改用台語發音
Tû-liáu kui-tshut hì kái-iōng Tâi-gí huat-im

閣kā十九世紀
Koh kā tsa̍p-káu sè-kí

露西亞庄跤中產階級四角戀情
Lōo-se-a tsng-kha tiong-sán-kai-kip sì-kak luân-tsîng

徙到日本時代的台灣來重表現
Suá-kàu Ji̍t-pún sî-tāi ê Tâi-uân lâi tîng piáu-hiān.


(台南人劇團導演 呂柏伸)

以前做西方經典
Í-tsîng tsò se-hng king-tián

可比講處理Shakespeare(『莎士比亞』)
Khó-pí kóng tshú-lí Shakespeare

阮袂kā時空變動
Guán bē kā sî-khong piàn-tōng

這擺為著欲予觀眾
Tsit-pái uī-tio̍h beh hōo kuan-tsiòng

因為我感覺這个戲有合
In-uī guá kám-kak tsit-ê hì ū-ha̍h

所以阮就kā時空
Sóo-í guán tō kā sî-khong

規个徙來1930年代的日本時代
Kui-ê suá-lâi 1930 nî-tāi ê Ji̍t-pún sî-tāi
戲內底所有角色攏變做
Hì lāi-té sóo-ū kak-sik lóng piàn-tsò

台灣在地化的名
Tâi-uân tsāi-tē-huà ê miâ



台南人劇團25年前
Tâi-lâm-lâng ki̍k-thuân 25 nî tsîng

佇咧台南創辦
Tī-leh Tâi-lâm tshòng-pān

毋管是原創的創作
M̄-kuán sī guân-tshòng ê tshòng-tsok

抑是這幾年
Ia̍h-sī tsit kuí-nî

西方經典台語翻譯計畫
Se-hng king-tián Tâi-gí huan-i̍k kè-i̍k

攏得著誠懸的評價
Lóng tit-tio̍h tsiânn kuân ê phîng-kè

但是南部欠缺整體表演藝術產業
Tān-sī lâm-pōo khiàm-khuat tsíng-thé piáu-ián gē-su̍t sán-gia̍p

舊年劇團宣布將辦公室徙去台北
Kū-nî ki̍k-thuân suan-pòo pān-kong-sik suá-khì Tâi-pak

引起南部藝文界震撼
Ín-khí lâm-pōo gē-bûn-kài tsìn-hām


今年「海鷗」這齣年度大戲
Kin-nî “Hái-au” tsit tshut nî-tōo tuā-hì

配合高雄春天藝術節佇咧高雄首演
Phuè-ha̍p Ko-hiông Tshun-thinn Gē-su̍t-tsiat tī-leh Ko-hiông siú-ián

但是票房無講蓋理想
Tān-sī phiò-pâng bô-kóng kài lí-sióng

劇團承認講
Ki̍k-thuân sîng-jīn kóng

南部藝文市場猶需要閣較拍拚經營
Lâm-pōo gē-bûn tshī-tiûnn iáu su-iàu koh-khah phah-piànn king-îng

期待地方年度性的藝術節
Kî-thāi tē-hng nî-tōo-sìng ê Gē-su̍t-tsiat

會當閣較穩定來支持在地團體
Ē-tàng koh-khah ún-tīng lâi tsi-tshî tsāi-tē thuân-thé.

(團長 李維睦)

你看按呢設計人員就有矣
Lí khuànn án-ne siat-kè jîn-uân tō ū- -ah

工作人員就有穡頭矣
Kang-tsok jîn-uân tō ū sit-thâu- -ah

你愛用十冬抑二十冬
Lí ài īng tsa̍p tang ia̍h jī-tsa̍p tang

來看這項代誌
Lâi khuànn tsit-hāng tāi-tsì

毋通用兩冬抑三冬
M̄-thang īng nn̄g tang ia̍h sann tang

你用兩三冬 其實伊
Lí īng nn̄g sann tang, kî-si̍t i

猶未發展- -起來就無- -去-矣
Iáu-buē huat-tián- -khí-lâi tō bô- -khì-ah


今年高雄的春天藝術節
Kin-nî Ko-hiông ê Tshun-thinn Gē-su̍t-tsiat

已經是第三年
Í-king sī tē-sann nî

台南嘛是頭一擺舉辦台南藝術節
Tâi-lâm mā-sī thâu-tsi̍t pái kí-pān Tâi-lâm Gē-su̍t-tsiat

推出國內四十个團隊攏總72个節目
Thui-tshut kok-lāi sì-tsa̍p ê thuân-tuī lóng-tsóng 72 ê tsiat-bo̍k

劇團認為講
Ki̍k-thuân jīn-uî kóng

南部兩都攏佇咧舉辦大型藝術節
Lâm-pōo nn̄g too lóng tī-leh kí-pān tuā-hîng Gē-su̍t-tsiat

可見政府對文化的重視
Khó-kiàn tsìng-hú tuì bûn-huà ê tiōng-sī

但是在地團體的支持
Tān-sī tsāi-tē thuân-thé ê tsi-tshî

著愛閣較有計畫性
Tio̍h-ài koh-khah ū kè-i̍k-sìng

嘛愛減少分送免費的票
Mā ài kiám-tsió pun-sàng bián-huì ê phiò

才會當予南部的藝文發展閣較健全
Tsiah ē-tàng hōo lâm-pōo ê gē-bûn huat-tián koh-khah kiān-tsuân

沒有留言:

張貼留言

注意:只有此網誌的成員可以留言。

台文通訊BONG報

台文通訊BONG報 https://tsbp.tgb.org.tw