● 感謝支持台灣母語運動 捐款贊助可抵稅 ● 郵政劃撥 19021486 財團法人李江却台語文教基金會 ● 華南銀行士林分行活儲 123-20-050514-2 財團法人李江却台語文教基金會 ● 操作線上捐款選匿名捐款者若無MAIL,可填 akhioh@gmail.com(基金會mail) ● 線上捐款(定期定額) https://donate.newebpay.com/Period/akhioh/lkk ● 線上捐款(單筆) https://donate.newebpay.com/akhioh/lkk
2012年4月25日 星期三
【看世事講台語】鴟鴞出世捌雞栽
編輯 / 黃能揚、李江却台語文教基金會 陳豐惠 劉承賢
標題:在地鳥伊上大骿 林鵰賰無一千隻
Tsāi-tē-tsiáu i siōng-tuā phiann, nâ-tiau tshun bô tsi̍t tshing tsiah.
(華語)本土最大留鳥 林鵰全台不到千隻
標題:十八冬追蹤林鵰 記錄片予人看明瞭
Tsa̍p-peh tang tui-tsong nâ-tiau, kì-lo̍k-phìnn hōo lâng khuànn bîng-liâu.
(華語)追蹤林鵰18載 紀錄片一窺山林魅影
標題:林鵰拍做記錄片 疼惜生態做知見
Nâ-tiau phah-tsò kì-lo̍k-phìnn, thiànn-sioh sing-thài tsò ti-kìnn.
(華語)鏡頭下的林鵰 籲全民珍愛生態環境
諺語:鴟鴞出世捌雞栽。
Bā-hio̍h tshut-sì bat ke-tsai.
這句話ê意思是鴟鴞一出世,就知影雞仔囝是伊通掠來食ê對象,這句諺語是借林鵰ê櫳親情(lang-tshin-tsiânn;華語『遠親』)鴟鴞來講食物件是人生成會- -ê,是天性,是自然ê需要。
佇咧山林中生活
Tī-leh suann-nâ tiong sing-ua̍h
真孤老
Tsin ko͘-láu
這種佇咧天頂飛的林鵰
Tsit-tsióng tī-leh thinn-tíng pue ê nâ-tiau
展翅闊度達到180公分
Thián-si̍t khuah-tōo ta̍t-kàu tsi̍t-pah peh-tsa̍p kong-hun
是台灣本土體型上大的惡鳥
Sī Tâi-uân pún-thóo thé-hîng siōng-tuā ê ok-tsiáu
數量真少
Sòo-liōng tsin-tsió
無到1000隻
Bô-kàu tsi̍t-tshing tsiah
為著記錄林鵰的生活
Uī-tio̍h kì-lo̍k nâ-tiau ê sing-ua̍h
一位猛禽研究會研究員
Tsi̍t-uī bíng-khîm gián-kiù-huē gián-kiù-uân
用18年時間
Īng tsa̍p-peh tang ê sî-kan
四界走揣林鵰的行蹤
Sì-kè tsáu-tshuē nâ-tiau ê hîng-tsong
台灣猛禽研究會 研究員 林文宏
假使一个山區
Ká-sú tsi̍t-ê suann-khu
你有看著一對林鵰
Lí ū khuànn-tio̍h tsi̍t-tuì nâ-tiau
規年迵天活甲好勢好勢
Kui-nî-thàng-thinn ua̍h kah hó-sè hó-sè
代表伊規年愛食掉
Tāi-piáu i kui-nî ài tsia̍h-tiāu
幾百隻的膨鼠 飛鼠 鳥仔
Kuí-pah tsiah ê phòng-tshí, pue-tshí,tsiáu-á
就表示這个山的
Tō piáu-sī tsit-ê suann ê
生物資源非常豐富
Sing-bu̍t tsu-guân hui-siông hong-hù
伊是一種健康的
I sī tsi̍t-tsióng kiān-khong ê
豐富的生物系統指標
Hong-hù ê sing-bu̍t hē-thóng tsí-phiau
林文宏佮幾位同伴
Lîm Bûn-hông kap kuí-uī tâng-phuānn
定定盤山過嶺
Tiānn-tiānn puânn-suann kuè-niá
佇咧坪林的森林中
Tī-leh Pînn-nâ ê sim-lîm tiong
觀察幾若年
Kuan-tshat kuí-nā nî
總算揣著林鵰停歇的所在
Tsóng-sǹg tshuē-tio̍h nâ-tiau thîng-hioh ê sóo-tsāi
in克服危險佮驚惶
In khik-ho̍k guî-hiám kap kiann-hiânn
peh樹仔接近林鵰的鳥仔岫
Peh tshiū-á tsiap-kīn nâ-tiau ê tsiáu-á-siū
才會當近距離觀察著
Tsiah ē-tàng kīn-kī-lī kuan-tshat tio̍h
林鵰揣食物
nâ-tiau tshuē tsia̍h-mi̍h
猶閣有生湠的生態過程
Iáu-koh ū senn-thuànn ê sing-thài kuè-thîng
而且遮的珍貴影像
Jî-tshiánn tsia-ê tin-kuì iánn-siōng
嘛予人拍做記錄片
Mā hōo lâng phah-tsò kì-lo̍k-phìnn
<山林魅影-林鵰>紀錄片導演 梁皆得
其實真濟時間攏khai佇等待
Kî-si̍t tsin-tsē sî-kan lóng khai tī tán-thāi
因為林鵰伊啥物時陣欲出來
In-uī nâ-tiau i siánn-mih sî-kan beh tshut- -lâi
阮攏毋知
Guán lóng m̄-tsai
較僫的就是揣伊的岫
Khah oh- -ê tō-sī tshuē i ê siū
因為伊的岫攏真iap-thiap 真罕見
In-uī i ê siū lóng tsin iap-thiap, tsin hán-kiàn
欲揣著伊的岫真無簡單
Beh tshuē-tio̍h i ê siū tsin-bô kán-tan
阮佇遮長的期間
Guán tī tsiah tn̂g ê kî-kan
干焦揣著兩个岫
Kan-ta tshuē-tio̍h nn̄g-ê siū
仝款是愛鳥仔人士的導演
Kâng-khuán sī ài tsiáu-á jîn-sū ê tō-ián
綴林文宏的跤步
Tuè Lîm Bûn-hông ê kha-pōo
用鏡頭完整記錄
Īng kiànn-thâu uân-tsíng kì-lo̍k
林鵰的生活佮面臨的挑戰
nâ-tiau ê sing-ua̍h kap biān-lîm ê thiau-tsiàn
也希望透過影片
Iā hi-bāng thàu-kuè iánn-phìnn
予逐家了解生態保育的重要性
Hōo ta̍k-ke liáu-kái sing-thài pó-io̍k ê tiōng-iàu-sìng.
(註:「惡鳥」就是「猛禽」的意思)
訂閱:
張貼留言 (Atom)
湠開台語文影視內容:電影‧戲劇‧動畫‧漫畫‧流行音樂
【台語sa攏有】湠開台語文影視內容:電影‧戲劇‧動畫‧漫畫‧流行音樂 報名網址 https://lkkpomia.tgb.org.tw/posts/207 費用:免費參加,請先報名,實名制。 主講人: 張永昌 肯特動畫數位獨立製片公司創辦人、現任「湠臺灣電影公司」總經理 大...

-
「語言平權連署書」表單連結 台文版: https://forms.gle/VJKTFoSNHybhN6Fv5 華文版: https://forms.gle/Sz7gmjxBYsJ62T7R6 承諾書手板下載 白話字版本 https://reurl.cc/VRjQbY 教育部台...
-
檔案下載 (A3, 彩色雷射影印,建議用厚紙抑是相片紙) https://reurl.cc/6LvXVb 黑白檔案(用紅紙影印) https://reurl.cc/EXlxek
猶閣有生湠的生態過程
回覆刪除Iáu-koh ū senn-thuànn êsing-thài kuè-thîng (?)
Iáu-koh ū senn-thuànn ê sing-thài kuè-thîng (OK)
in克服危險佮驚惶 (?)
In克服危險佮驚惶 (OK)
感謝費心掠出錯誤,ē緊請公視同工修改。請繼續指教。
回覆刪除諺語:鴟鴞出世捌雞裁。(?)
回覆刪除諺語:鴟鴞出世捌雞栽。(OK)
雞「栽」ê問題有kā公視反應--ah,in會修改。感謝指正!
回覆刪除