合刊、徵稿－－Hō͘讀者兄姊ê一張批

Gún敬愛ê兄姊新年恭喜：

自從《台文通訊》編輯ê khang-khuè決定suá轉來台灣了後，李江却台語文教基金會就一直teh思考兩份刊物－－《台文BONG報》kap《台文通訊》未來ê方向。Gún khioh去考慮進一步tshui廣刊物ê目標hām人力、財務ê實際需要以外，上要意--ê，就是恁ê意見，所以，gún tī今年秋天，透過葉書（『明信片』）、電子批等等ê方式，只要gún有連絡方式--ê，lóng發出調查問卷，taⁿ問卷回收kah一个坎站，統計mā完成--ah。

Tsit擺讀者調查，有超過兩成ê讀者兄姊kā gún回覆，tī調查實務來講，比率真kuân，內中，超過八成ê人贊成兩份刊物合刊（81%），合刊了後ê刊物名稱，《台文通訊》kap《台文BONG報》得著絕對多數ê支持，關係發刊頻率，有超過七成ê讀者希望是取月刊ê形式（74%），恁ê心聲，gún聽--著-ah。

自án-ne，決定2012年2--月開始，kā兩份刊物，用《台文通訊BONG報》ê名改版，逐月日發行，tsit份刊物，雖bóng仝款是採用再生紙kap環保油墨印刷，冊皮ē換做彩色--ê，ǹg望伊m̄-nā hō͘讀者兄姊有koh-khah好ê閱讀經驗，mā ē-tàng koh-khah有才調吸引一般大眾，tsiâⁿ做引tshuā in熟sāi台語文ê大使。
Gún

刊物beh好，除了皮面好看，內容mā bē用得失覺察，總--是，列位兄姊熱情投稿，是好ê作品ê主要來源，gún真歡迎逐家kā筆攑--起-來，透過創作、書寫，做伙來充實台語文ê內涵，gún mā ē盡力，透過提高稿費，來表達gún對恁ê感謝。

Uì讀者調查ê結果，gún看著讀者兄姊對刊物內容ê期待，逐家希望增加ê內容，包括：田野語料ê記錄kap註解、台語文教學、新聞、運動、演講稿、環境、文化、文學評論、藝術、科學、哲學、語言學、國際等等，講包山包海一點仔to無過份；實在講，gún mā真愛刊物內底有tsiah-nī仔多元、phong-phài ê內容，m̄-koh，除了邀稿，讀者兄姊恁個人ê經歷、專業，就是刊物多元內容ê寶庫，gún tī tsia無嫌麻煩，koh一擺邀請恁tiāⁿ-tiāⁿ投稿、綿爛綿tsiⁿ投稿，用稿件，來灌沃tsit塊已經有二十冬歷史、咱共同ê母語園地。

合刊了後，gún ē kā部份刊物內容，配合上kài tio̍h時ê台語文消息，編做電子報（調查結果，有73% ê讀者有意願收著電子報），寄hō͘逐家，歡迎逐家轉寄，mā歡迎有意願收著電子報ê兄姊，隨時kā gún講恁ê電子批位址。另外，gún mā邀請逐家來加入「李江却台語文教基金會」tī Facebook kap Google Plus ê『粉絲頁』／「專頁」，不時來gún ê網站（http://www.tgb.org.tw）行踏。

請逐家繼續kā gún指教、支持、鼓勵，感謝逐家！

《台文通訊》＆《台文BONG報》
編輯部  敬筆