《臺江臺語文學》第二十三期專題徵稿啟事~主題：劇本kap臺語戲專題

《臺江臺語文學》
第二十三期專題徵稿啟事

主題：
劇本kap臺語戲專題

1977年9--月，王禎和出版訪談錄《電視‧電視》（臺北：遠景）。Tī〈訪問阿匹婆〉tsit篇，作者問阿匹婆：是án-tsuánn伊臺語hiah tuann-tiah，ah大多數ê演員臺語nah ē hiah lóo？阿匹婆回--伊ê話，tō tsiânn-tsò學者所謂ê文學史經驗──「臺語齣國語劇本現象」ê典故：「劇本都是用國語寫的。大部分的演員就把劇本上的國語硬生生地翻成閩南語來講，不怪一般聽眾會聽不順耳。……我不大認得字，往往要導演或是我先生把劇本上的臺詞講一遍給我聽……我就用我自己的話把劇本上用國語寫的臺詞順過來，有時甚至把原來的詞句整個改變……」臺語齣國語劇本現象是臺語文化史顯頭suah少探ê「症頭」，代表語言殖民ê歷史脈絡、kàu-tann iáu tī--leh ê語際權力關係。

臺語齣國語劇本是語言殖民史ê「主流」，ah「lán ê劇本」--leh？Lán人話ê劇本（臺語劇本），tī tah-lo̍h？本專題按算án-ne tshui-pâi：1.選刊少人知ah-sī「出土」ê臺語劇本；針對tsiah ê文學kap作家做紹介。2.回顧當代ê臺語劇本創作、演出kap出版，邀請當代作家自述編劇經驗，選刊in新寫ê劇本。3. 國語劇本kap正宗臺語劇本lia̍h外，有一款臺、華thàu-lām ê「鄉土文體」劇本──íng-íng kōo全漢字書寫、出版，稱「（臺語）漢字劇本」。針對tsit lō「漢字劇本」，編輯部ē用khah sù-sī方式呈現，報ta̍k-ê jīn-bat tsiah ê戲齣經驗ê文學史意義。4.歡迎投戲劇史、論kap劇本稿。

第23期：2017年8月初5出版、8月15上市；6月20截稿。

--------------------------------

●雜誌內容

本雜誌屬臺語文學刊物，便若屬臺語文學作品，無論詩、散文、戲劇（上濟 5000 字）、小說（上濟 10000 字）、七字仔（有故事性 ê 歌謠）、囡仔歌詩 kap 文學賞析、文學評論（上濟 5000 字）等，攏歡迎投稿，投稿請盡量附作者生活相片、無版權問題ê相關圖片kap 簡要ê 圖片說明文字。

●書寫文字

以臺語文書寫為主；會得接受少數 ê 文學評論稿以華文書寫。
使用臺語文字 ê 原則：參照臺南市文學獎臺語組徵文 ê 原則，接受全漢字、漢羅濫寫 kap 全羅馬字ê 方式，漢字使用教育部推薦常用漢字（包含異用字）為主，羅馬字採用教育部「臺羅」方案。來稿部份無適當 ê 漢字，本刊有刪改權。

●投稿方式

內容包含 word 檔案一份 kap pdf 檔案一份，嘛請填寫作者資料表：姓名、單位、職稱、電話、身份證字號、郵局抑是銀行口座、e-mail、通訊地址 kap 50 字以內 ê 作者簡介，以 e-mail 傳到taikangtaigi@gmail.com，主旨註明「投稿臺江臺語文學」。
若無接著本刊「有收著」ê 回應，請閣來批確認。
來稿一律無退還；請毋通一稿兩投。

●撰稿格式：
新細明體 12 號，A4 規格。

●著作權事宜：
錄取 ê 稿件kap 圖片，作者保證無侵害他人著作權 kap 違背著作權法等現行各項法規 ê 行為；若有以上狀況，作者愛家己負擔法律責任並賠償機關損害。

●來稿若有刊登，會有稿費 kap 彼期季刊兩本。
（註：國外匯款手續繁複koh 雙爿手續費真傷重，投稿者若無臺灣國內銀行iah 郵局口座，就無稿費；請包涵kap 體諒。）