《臺江臺語文學》第二十一期專題徵稿啟事

主題：臺語教師創作

臺語作家內底，有1款作家類型，少人去歸納、做研究；研究lia̍h外，mā少人去斟酌in ê「文學」作品，ah-sī講讀in ê文學作品，罕leh致覺in創作外ê身份。Tsit lō作家類型，tō是臺語老師（臺語教師）。Tī tsia，lán講ê「臺語老師」是e̍h義--ê，10幾冬來，in有1 ê「giám-ngē」ê「官」銜（官廳hōo--in ê頭銜），號做「本土語言支援人員」。無老師名，有老師行。學生gín-á叫in老師，有老師名，m̄ -koh無老師應有ê尊嚴kap待遇。

本專題beh做--ê tō是tsit群「先生人」ê臺語文書寫。講「臺語文書寫」，有廣義kap e̍h義：e̍h義指稱4大文類，詩、小說、劇本kap「文學散文」，4大文類lóng有ê「兒童文學」tiānn-tio̍h kuah在內。廣義ê台語文書寫，是針對「散文」講--ê。To散文，類型包山包海，「文學散文」lia̍h外，本專題iáu是ē收無hiah「文學」ê散文作品。是講廣義bóng廣義，有幾項á書寫類型，本專題無法度處理：語言研究、4大文類外ê教材……

歡迎ta̍k-ê tī頂--á所規範ê à-lù內底，針對下列主題投稿：1.臺語老師寫ê文學作品，詩、小說、劇本kap文學散文；2.針對tsiah ê作品ê文學評論。3.有人講臺語老師無siánn leh讀文學冊──m̄ 是無愛讀冊，是少leh買、少leh讀「文學冊」，歡迎臺語老師針對tsit ê假設（謠言？），sió pué-huē--一-下：歡迎tsiah ê臺語老師，寫文kā ta̍k-ê講lín是án-nuá看文學作品--ê，ah-sī報gún知lín tī教學現場ê「文學教育」經驗。4.臺語老師ê創作談。5.臺語老師，針對lín giám-ngē ê教學經驗，寫khah軟性ê散文。

第21期：2017年3月初5出版、3月15上市；1月20截稿。


-------------------------------

《臺江臺語文學》長期徵稿啟事

一、雜誌內容

本雜誌屬臺語文學刊物，便若屬臺語文學作品，無論詩、散文、戲劇（上濟 5000 字）、小說（上濟 10000 字）、七字仔（有故事性 ê 歌謠）、囡仔歌詩 kap 文學賞析、文學評論（上濟 5000 字）等，攏歡迎投稿，投稿請盡量附作者生活相片、無版權問題ê相關圖片kap 簡要ê 圖片說明文字。

二、書寫文字

以臺語文書寫為主；會得接受少數 ê 文學評論稿以華文書寫。

使用臺語文字 ê 原則：參照臺南市文學獎臺語組徵文 ê 原則，接受全漢字、漢羅濫寫 kap 全羅馬字ê 方式，漢字使用教育部推薦常用漢字（包含異用字）為主，羅馬字採用教育部「臺羅」方案。來稿部份無適當 ê 漢字，本刊有刪改權。

三、截稿 kap 出刊日期

歡迎隨時來投稿。逐期tī 出刊一個半月前截稿。

四、投稿方式

1.內容包含 word 檔案一份 kap pdf 檔案一份，嘛請填寫作者資料表：姓名、單位、職稱、電話、身份證字號、郵局抑是銀行口座、e-mail、通訊地址 kap 50 字以內 ê 作者簡介，以 e-mail 傳到taikangtaigi@gmail.com，主旨註明「投稿臺江臺語文學」。

2.若無接著本刊「有收著」ê 回應，請閣來批確認。

3.來稿一律無退還；請毋通一稿兩投。

五、撰稿格式：

新細明體 12 號，A4 規格。

六、著作權事宜：

錄取 ê 稿件kap 圖片，作者保證無侵害他人著作權 kap 違背著作權法等現行各項法規 ê 行為；若有以上狀況，作者愛家己負擔法律責任並賠償機關損害。

七、來稿若有刊登，會有稿費 kap 彼期季刊兩本。

（註：國外匯款手續繁複koh 雙爿手續費真傷重，投稿者若無臺灣國內銀行iah 郵局口座，就無稿費；請包涵kap 體諒。）