台語編輯 / 李江却台語文教基金會、黃能揚
標題：迎太平媽踩街 西螺米飯丸在人提
Ngiâ Thài-pîng-má tshái-ke, Sai-lê-bí pn̄g-uân tsāi lâng the̍h
(華語)太平媽遶境 西螺米飯糰慰勞志工
標題：紮咧欲食免驚無 飯丸替西螺米廣告
Tsah–leh beh tsia̍h bián kiann bô, pn̄g-uân thè Sai-lê-bí kóng-kò.
(華語)飯糰方便外出食用 兼可推廣西螺米
標題：志工鬥迎太平媽 勇士飯丸食予飽
Tsì-kang tàu ngiâ Thài-pîng-má, ióng-sū pn̄g-uân tsia̍h hōo pá.
(華語)太平媽遶境 勇士飯糰補充志工體力
諺語：一兼二顧，摸蜊仔兼洗褲。
It kiam jī kòo, bong lâ-á kiam sé khòo.
雲林的太平媽做鬧熱出來踩街，西螺農會趁這个機會，用西螺米做飯丸來請遮的鬥相共的大大細細，毋若予志工毋免枵腹肚，飯丸紮咧閣真利便，順紲嘛共西螺米鬥做宣傳，一來慰勞志工，二來是一擺蓋成功的廣告，俗語話講：「一兼二顧，摸蜊仔兼洗褲」，或者是講「一餌釣雙魚」，差不多就是咧講這款做一件工課，有幾若个路用的情形。
用西螺米煮起來的飯
Īng Sai-lê-bí tsú–khí-lâi ê pn̄g,
看起來蓋芳 蓋khiu 蓋好食
khuànn–khí-lâi kài phang kài khiu kài hó-tsia̍h,
內底擱有包簡單的料
lāi-té koh ū pau kán-tan ê liāu,
這就是好味的勇士飯丸
tse tō sī hó-bī ê ióng-sū pn̄g-uân.
這是西螺鎮農會
Tse sī Sai-lê-tìn Lông-huē
為著慰勞西螺太平媽的踩街隊伍
uī-tio̍h uì-lō Sai-lê Thài-pîng-má ê tshái-ke tuī-ngoó,
出動真濟人 欲做將近五百粒的勇士飯丸予逐家來食
tshut-tōng tsin tsē lâng, beh tsò tsiong-kīn gōo-pah lia̍p ê ióng-sū pn̄g-uân hōo ta̍k-ke lâi tsia̍h.
西螺鎮農會總幹事 廖錦富
因為今仔日是福興宮in遊街踩路
In-uī kin-á-ji̍t sī Hok-hing-kiong in iû-ke tshái-lōo,
遐的踩街的人
hia-ê tshái-ke ê lâng,
就親像勇士仝款
tō tshin-tshiūnn ióng-sū kāng-khuán,
in不止仔辛苦啦
in put-tsí-á sin-khóo–lah,
毋才農會會想著
m̄-tsiah Lông-huē ē siūnn-tio̍h,
欲做這个號做勇士飯丸
beh tsò tsit-ê hō-tsò ióng-sū pn̄g-uân,
通推廣咱的西螺米
thang tshui-kóng lán ê Sai-lê-bí.
因為現此時咱的米
In-uī hiān-tsú-sî lán ê bí,
量是一冬較減一冬
liōng sī tsi̍t tang khah kiám tsi̍t tang.
因為早期的原住民抑是農民
In-uī tsá-kî ê guân-tsū-bîn ia̍h-sī lông-bîn,
欲出外地抑是去山頂做工課
beh tshut guā-tē ia̍h-sī khì suann-tíng tsò khang-khuè,
食飯攏是一个大問題
tsia̍h-pn̄g lóng sī tsi̍t ê tuā būn-tê.
後來規氣做飯丸紮咧身軀來治枵
Āu–lâi kui-khì tsò pn̄g-uân tsah leh sin-khu lâi tī-iau.
現在農會將做好的飯丸
Hiān-tsāi Lông-huē tsiong tsò hó ê pn̄g-uân,
sak來予踩街的工作人員
sak lâi hōo tshái-ke ê kang-tsok jîn-uân,
逐家趕緊tháu來食
ta̍k-ke kuánn-kín tháu lâi tsia̍h,
補充體力
póo-tshiong thé-la̍t,
嘛呵咾西螺米做的飯丸
mā o-ló Sai-lê-bí tsò ê pn̄g-uân,
口味確實無仝款
kháu-bī khak-si̍t bô-kāng-khuán.
西螺福鄉宮董事長 楊文鐘
做一寡飯丸來予咱的信眾做點心
Tsò tsi̍t-kuá pn̄g-uân lâi hōo lán ê sìn-tsiòng tsò tiám-sim,
腹肚枵充飢
pak-tóo iau tshiong-ki.
咱閣幾若工咧
Lán koh kuí-nā kang–leh,
後壁會用得閣加做寡
āu-piah ē-īng-tit koh ke tsò–kuá.
因為西螺太平媽踩街相連紲十四工
In-uī Sai-lê Thài-pîng-má tshái-ke sio-liân-suà tsa̍p-sì kang,
全程攏有來自各地的志工鬥相共
tsuân-tîng lóng ū lâi tsū kok-tē ê tsì-kang tàu-sann-kāng,
in需要補充體力
in su-iàu póo-tshiong thé-la̍t.
而且西螺米做的飯丸和一般的秫米無仝款
Jî-tshiánn Sai-lê-bí tsò ê pn̄g-uân hām it-puann ê tsu̍t-bí bô-kāng-khuán,
較袂有消化不良的問題
khah bē ū siau-huà put-liông ê būn-tê,
毋但方便食用
m̄-nā hong-piān si̍t-iōng,
嘛會用得順紲推廣雲林西螺在地的米食文化
mā ē-īng-tit sūn-suà tshui-kóng Hûn-lîm Sai-lê tsāi-tē ê bí-si̍t bûn-huà.
留言
張貼留言