【看世事講台語】未喙焦先開井

台語編輯 / 李江却台語文教基金會



新聞標題：核災厲害 議員愛首都徙對台中來

Hi̍k-tsai lī-hāi, gī-uân ài siú-too suá tuì Tâi-tiong lâi



胡志強伨遷都 向望立委選了推動

Ôo Tsì-kiông thīn tshian too, ǹg-bāng li̍p-uì suán-liáu tshui-tōng

伨 / thīn：支持



諺語：未喙焦先開井

Bē tshuì-ta sing khui tsénn

這爿的「未」是「猶未」的意思，毋是「袂」的意思



內文：

日本福島核電廠的災害

Ji̍t-pún Hok-tó (Fukujima) hi̍k-tiān-tshiúnn ê tsai-hāi



若準講是發生佇咧台灣

nā tsún-kóng sī huat-sing tī leh Tâi-uân



首都台北市可能頭一个會受著影響

Siú-too Tâi-pak-tshī khó-lîng thâu-tsi̍t-ê ē siū-tio̍h íng-hióng



所以台中市議員就建議講

Sóo-í Tâi-tiong-tshī gī-uân tō kiàn-gī kóng



上好是遷都到台中

siōng-hó sī tshian too kàu Tâi-tiong



台中市議員黃馨慧



頭腦若是先去著傷

Thâu-náu nā-sī sing khì tio̍h-siong



按呢是欲按怎tsih接身體別的部份

án-ne sī beh án-tsuánn tsih-tsiap sin-thé pa̍t-ê pōo-hūn



所以做頭的指揮中心

Sóo-í tsò thâu ê tsí-hui tiong-sim



本成就愛下踮上定當的位仔

pún-tsiânn tō ài hē tiàm siōng tīng-tòng ê uī-á



而且是上安全的所在

jî-tshiánn sī siōng an-tsuân ê sóo-tsāi



議員表示

Gī-uân piáu-sī



台北市傷倚近核電廠

Tâi-pak-tshī siunn uá-kīn hi̍k-tiān-tshiúnn



而且閣會淹水

jî-tshiánn koh ē im-tsuí



為著防災的考量佮國家的安全

Uī-tio̍h hông-tsai ê khó-liông kap kok-ka ê an-tsuân



首都遷來台中

siú-too tshian lâi Tâi-tiong



會當有充足的空間來應變

ē-tàng ū tshiong-tsiok ê khong-kan lâi ìng-piàn



尤其是佇咧烏日到成功嶺

Iû-kî sī tī leh Oo-ji̍t kàu Sîng-kong-niá



所在較懸 交通嘛方便

sóo-tsāi khah kuân kau-thong mā hong-piān



是真好的地點

sī tsin hó ê tē-tiám



市長胡志強嘛表示贊成

tshī-tiúnn Ôo Tsì-kiông mā piáu-sī tsàn-sîng



胡志強 台中市長



飛行機場 港口發展的空間嶄然仔大

Hui-hîng-ki-tiûnn káng-kháu huat-tián ê khong-kan tsám-jiân-á tuā



不止仔有後注

put-tsí-á ū āu-tù



閣來天時嘛蓋好

Koh lâi thinn-sî mā kài hó



空間嘛真夠額

khong-kan mā tsin kàu-gia̍h



我感覺咱政府有影著

Guá kám-kak lán tsìng-hú ū-iánn tio̍h



kā成見擲掉

kā sîng-kiàn tàn-tiāu



kā濟濟原本底的想法

kā tsē-tsē guân-pún-té ê siūnn-huat



斟酌kā想過

tsim-tsiok kā siūnn–kuè



聲音來源：黃國書 台中市議員



需要請中央政府

Su-iàu tshiánn Tiong-iong tsìng-hú



對整個遷都的影響

tuì tsíng-kô tshian-too ê íng-hióng



閣做較詳細的評估

koh tsò khah siông-sè ê phîng-kóo



民進黨的議員嘛表示

Bîn-tsìn-tóng ê gī-uân mā piáu-sī



台中所有腹地佮交通的條件

Tâi-tiong sóo-ū ho̍k-tē kap kau-thong ê tiâu-kiānn



攏比台北市好

lóng pí Tâi-pak-tshī hó



胡志強講

Ôo Tsì-kiông kóng



希望佇咧立委選後來推動

hi-bāng tī leh li̍p-uí suán āu lâi tshui-tōng



不過遷都是事關重大

Put-kò tshian-too sī sū kuan tiōng-tāi



台北市有政治佮經濟中心的地位

Tâi-pak-tshī ū tsìng-tī kap king-tsè tiong-sim ê tē-uī



恐驚閣需要閣較濟的評估

khióng-kiann koh su-iàu koh khah tsē ê phîng-kóo



佮全盤的考量

kap tsuân-puânn ê khó-liông