2016年1月22日 星期五

《臺江臺語文學》 第十八期專題徵稿啟事~主題: 白話字小說



講tio̍h白話字,khah tsē人想tio̍h巴克禮、賴仁聲kap鄭溪泮。Khiā tī臺南市文化建設ê立場講,in lóng是臺南作家;to lóng寫白話字,m̄ -tsiah講是臺南新文學ê「前行代」。鄭溪泮,永康蜈蜞潭人;i ê《出死線》(1926),起頭tō是leh寫hit khoo-le̍h-á ê風光。賴仁聲sui-bóng是臺中人,m̄ -koh南神出身,mā tī白河牧會;i ê名作《可愛ê仇人》(1960),一半khah ke leh寫臺南。巴克禮koh-khah免講,創辦《台灣府城教會報》(1885-),kā寫作舞台獻hōo tsit-ê時代、tsit-tè土地,kap tsē-tsē有才情ê臺語作家。


Tsit 3年á,出現1 ê新名詞――「白話字時代」。Siánn-m̍h是白話字ê時代?Lóng講白話字ê時代超過百冬,lán ê作家tàu-té寫過juā tsē小說?白話字小說家kám kan-na鄭溪泮、賴仁聲2 ê?第十八期ê專題tō按算sak tsit ê題目――「白話字小說」,有回顧式ê論述;拍算a̍h ē選刊早前khah無人讀--過ê作品(改做漢羅);mā歡迎文友寫全羅小說來投。回顧式ê論述,lia̍h幾ê-á題目:1.白話字小說ê文學史定位,歡迎sì-hng無kâng ê觀點。個論、總論lóng好:2.白話字小說ê美學定位;3.白話字小說家kap in ê作品。4. Mā歡迎文友針對個人ê閱讀經驗,寫「印象式」散文。
第十八期是2016年5月初5出版,5月15上市;3月20截稿。


書寫文字

以臺語文書寫為主;會得接受少數 ê 文學評論稿以華文書寫。
使用臺語文字 ê 原則:參照臺南市文學獎臺語組徵文 ê 原則,接受全漢字、漢羅濫寫 kap 全羅馬字ê 方式,漢字使用教育部推薦常用漢字(包含異用字)為主,羅馬字採用教育部「臺羅」方案。來稿部份無適當 ê 漢字,本刊有刪改權。


投稿方式

內容包含 word 檔案一份 kap pdf 檔案一份,嘛請填寫作者資料表:姓名、單位、職稱、電話、身份證字號、郵局抑是銀行口座、e-mail、通訊地址 kap 50 字以內 ê 作者簡介,以 e-mail 傳到taikangtaigi@gmail.com,主旨註明「投稿臺江臺語文學」。
若無接著本刊「有收著」ê 回應,請閣來批確認。
來稿一律無退還;請毋通一稿兩投。

來稿若有刊登,會有稿費 kap 彼期季刊兩本。
(註:國外匯款手續繁複koh 雙爿手續費真傷重,投稿者若無臺灣國內銀行iah 郵局口座,就無稿費;請包涵kap 體諒。)