2018年3月21日 星期三

紀念溫柔、堅定ê母語運動者:黃晴美



陳豐惠(李江却台語文教基金會執行長)

二月初聽著晴美姊瑞典過身ê消息,雖bóng心肝tiuh-tiuh疼,但是koh有淡薄仔感覺伊tsiânn有「福氣」-除了伊thang脫離幾若年來ê失智以外,聽講過身進前無艱苦偌久;顛倒是對晴美姊ê翁婿Percy-八十幾歲ê藝術家紳士-tsiok oh承擔這个意外ê打擊感覺真毋甘。

大部份了解四二四刺殺蔣經國事件ê有志大概lóng知影晴美姊是參與這个事件ê其中一个,但是應該真少人知影,晴美姊除了是台獨運動ê行動者,是溫柔、堅定ê母語運動者。


2004年基金會舉辦「台文通訊海內外交流座談會」

講晴美姊是溫柔、堅定ê母語運動者,因為伊用溫柔ê聲嗽別人講伊對「漢羅合用」台語書寫ê認同,而且雖bóng倚六十歲chiah有機會開始學習台語讀寫,真短ê時間內就親身實踐,認定台語讀寫是台灣人ê本份,家己無行動--得;就算伊已經有嚴重ê失智症頭,這幾冬有機會用skype通話ê時,伊笑笑直直重複teh----ê--是:「最近台灣ê母語運動啥款Chòe-kūn Tâi-oân ê bó-gú ūn-tōng sáⁿ-khoán?」,心心念念--ê 攏是台灣ê母語。

記得是1999iah 2000êkap晴美姊結緣--ê,伊當初大概是聽黃文雄先生講--ê,一旦有機會轉來到台灣,為beh支持台灣母語運動beh了解相關資訊,就主動kap李江却台語文教基金會連絡,m̄-nā參加活動,koh不時捐款。伊主動講伊讀《台文通訊》、《台文BONG報》雜誌了後,感覺用母語chiah有法度寫家己真實ê想法,就用家己學其他語言ê方法加減試寫台文作品,想beh記錄家族ê故事。

某一擺開講ê時,我邀請伊替《台文BONG報》雜誌「台灣人寫真」專欄寫稿,伊隨就答應,但是希望我一定ài替伊看稿,伊驚家己對台語文用字ê掌握iáu無夠好勢;面對經過chiah-nī濟苦難koh chiah-nī謙卑ê長輩願意用母語寫家己ê家族故事,實在真歡喜,就án-ne開始一篇一篇〈追想四二四事件kap gún tau ê故事〉編輯校對ê過程。

20043月份,晴美姊特別配合「台文通訊海內外讀者聯誼活動」調整轉來台灣ê時間,kap加拿大、日本、台灣ê讀者hām《台文通訊》幾若任編輯熱烈交流、開講,我tùi難得ê聯誼活動相片看著目睭光sih-sih、心滿意足ê晴美姊。

晴美姊心思幼膩,溫柔體貼,寫好ê文章lóng ài--koh再讀,感覺有順chiah會放心。可惜〈追想四二四事件kap gún tau ê故事〉寫七pha了後就暫停--ah,晴美姊hit時是講伊認為有寡資料ài koh走揣kap查證chiah ē-tàng繼續寫,後--毋知啥原因lóngkoh寫;實在真遺憾!除了家族故事,晴美姊2002年主動建議beh kā瑞典「囡仔權利公約連線」團體tùi聯合國〈囡仔權利公約〉改寫了後國內推動ê內容翻做台文thang《台文BONG報》,這个系列mā tī雜誌連載幾若期,紀念文集kan-na收錄一篇,若有beh看其他篇--ê歡迎連絡李江却台語文教基金會,hitê合訂本有收。

十外冬來有一段時間,晴美姊平均一冬kap藝術家翁婿Percy轉來台灣一擺,若有轉--來,攏會sio-chhōeKap樸實ê晴美姊hām藝術家Percy翁仔某做伙是kài特殊ê經驗,晴美姊總--是滿面笑容,台語、瑞典語、英語三款語言隨時切換,看情形做通譯,聽in ê對話,雖bóng真濟內容聽無,m̄-koh我攏感覺chiok享受,因為目睭前--ê是一對天使;會記得Percy有泅水ê習慣,koh不時用色筆teh畫圖,m̄-nā送我幾若幅伊ê作品,有一擺koh刁工送我一个伊手工雕刻ê筆架。晴美姊mā bat送我瑞典製ê動物圖杯chūkap餐桌chū仔,攏是chiok感心ê同志情誼。印象chiok--ê是有一擺kap in翁仔某做伙去浸磺水,goán赤身露體笑談chhiàu-tâmhe是我頭擺無穿泅水衫去浸磺水,但是lóng bēkiàn-siàu,顛倒感覺chiok輕鬆自在。事後便若回想著hitê情景,攏想講he凡勢就是「天堂」。

幾若十冬得轉來台灣ê晴美姊,便若有機會轉--來,一定把握機會sì-kòe行踏,伊生活一向樸實勤儉,但是chiok gâu經營心適ê生活,像講挽路邊ê春仔花piⁿ做花環做粧thāⁿah若上興hèng--ê就是買幾支仔滷雞跤沓沓仔chhńg、聊聊仔khòe

Oān-nā寫,頭殼內koh浮出有溫柔笑面ê晴美姊kap你輕聲細說ê講話聲,siàuê話句kéⁿ tī心肝íⁿ仔個外月--ah,一直躊躇beh寫啥khah妥當,想想--leh就寫khah無人知êê另外一條運動跤跡;上尾beh kā你講:我beh koh kā你攬---下,感謝--你!晴美姊,期待再相會!

---------------


「晴美。天涯。人間」 黃晴美(1939-2018) 紀念座談會
鮮為世人所知的刺蔣案女英雄─黃晴美,讓我們再認識刺蔣案、重新認識黃晴美女士。
【協辦】二二八事件紀念基金會、二二八國家紀念館
【時間】2018年3月25日(日)下午2:00 - 4:00
【地點】二二八國家紀念館一樓展演廳
(台北市中正區南海路54號,捷運中正紀念堂站二號出口,往植物園方向走550公尺)
與會貴賓:
黃文雄、黃富雄、鄭自才、陳婉真、周婉窈、陳翠蓮、陳豐惠、沈清楷、蔡喻安、林秀幸
主持人:王俐茹
室內樂演奏:小提琴/張智欽、鋼琴/劉芝瑄

※請準時入場,以免向隅
追思文集由前衛出版社出版,一本定價$250
325當日,前衛會TĪ會場設立冊擔。


2018有影‧講台語~台語短片徵選(延長至4/30)

│ 活動網站 │ http://lkkpomia. tgb.org.tw │ 活動網站 │ 成功大學台灣文學系蔣為文教授說明主題 民視台語講世事主持人MOMO、李江却台語文教基金會執行長陳豐惠邀請逐家來參加 鬥陣來hip 台語影片 ,發...