2011年11月14日 星期一

李江却台語文教基金會緊急募款批(台文版)

列位疼惜李江却基金會kap咱爸母話ê兄姊平安:


今年秋天ê跤步有khah緊,小陽春看--起-來軟水無啥氣力,tī tsit个秋凊ê季節--裡,gún來kā逐家相借問,逐家一定ài穿hō͘燒,sian m̄-thang去感--著;另外,gún mā beh邀請恁繼續做伙來關心咱ê母語,beh hām恁分享李江却台語文教基金會tī tsit一段時間為台灣母語復振ê付出,上重要--ê是ài請恁ē-tàng綿爛kā gún tàu相thīn,因為恁ê定期kap非定期「題iân」(捐款/寄附),逐kho͘銀、逐sián錢,對gún ê事工lóng是上kài直接ê支持kap上kài溫暖ê鼓勵,mā hō͘咱ê爸母話有機會kap祖公祖媽留hō͘咱ê美麗家園,做伙延續,傳傳(thn̂g-thuân)過代。


M̄知咱十--月後半月ê時kám有注意著今年ê金鐘獎頒獎,tī tsit个ē-sái講是台灣Emmy獎(『艾美獎』)ê典禮內底,咱看著一个現象:客家電視台入圍ê項目有十五項hiah濟,而且tio̍h著戲劇節目獎、戲劇節目編劇獎kap兒童少年節目主持人獎三項,看著平平是在地語言ê客語ē-tàng tī大眾媒體踏著好地步,咱有影感覺歡喜,m̄-koh心內suah mā為著咱ê爸母話teh煩惱,因為咱ê台語事工無公部門預算ê大力支持,真需要逐家來相添tàu贊助,hō͘台語文ê事工ē-tàng一冬接suà一冬,bē因為秋天早來、雨水uàⁿ到,枵飢過頓,suah等bē赴春天來a-í-sá-tsuh。


Tsit幾年,咱ê 有志tī無仝ê都合呼籲ài成立「台語委員會/Hō-ló委員會」,咱知影講客委會tī 2011年「辦理推展客家語言發展計畫業務」ê預算就有一億九千五百萬,其中「辦理客語相關競賽kap推廣活動」編兩千一百萬,「全國客語能力分級認證」編六千兩百萬;tī媒體方面,「辦理推展、輔助客語傳播媒體業務計畫」編六億八千六百萬,內底獎/補助費編四千七百五十萬,若「推展客家平面媒體傳承客家文化」有編九百四十萬,雖然有米mā無保領就ē-tàng有焦鬆koh khiū ê白米飯,m̄-koh俗語話講:「巧新婦,無米煮無飯」,有影to tio̍h!咱ê台語事工,suah無thang有in tsiah-nī好空。


雖然經費無夠額,李江却台語文教基金會今年猶原真拍拚,除了超過十五冬來tong勻出版《台文通訊》、《台文BONG報》兩份台語文月刊,gún第四冬舉辦台灣母語詩人大會,投入各地台語文研習教學、suà接推動台語文讀冊會、創作出版、語言指導。今年開始,gún koh協助公共電視PNN網站「看世事講台語」單元ê標題台譯、諺語hām台語字幕製作,希望台語讀寫ē-tàng沓沓仔踮電子媒體爭取著空間;gún協辦世界台文營、海翁台文營、自由時報台語文讀寫班,支援高雄醫學大學台語文入門課程kap醫學台語計劃,參與長老教會白話字教材製作,協助成大台灣語文測驗中心舉辦全民台語檢定kap研習、教育部台灣閩南語能力檢定,tàu-saⁿ-kāng高雄市中小學kap幼稚園台灣母語日訪視hām協辦三重社大台語演劇活動等等。雖然gún ê人力kap資源有限,兩百萬ê基金規模,tī現此時ê非營利組織內底,實在是細漢仔內底ê細粒子,m̄-koh gún有力盡拚,拚勢做工,gún khang-khuè ê質kap量,m̄驚kap天霸王大ê文教基金會相比phīng,tī tsit个辛苦ê過程中,恁──gún敬疼ê列位兄姊,就是gún上大ê靠山!


總--是tī tsit个收冬ê季節,gún suah拄著原本就有限ê公部門補助一年khah減一年,民間ê捐款無夠支持gún多元事工ê困境,以今年舉辦第十屆ê「阿却賞」(台語文學創作kap台語文學研究獎勵金)做例,獨獨獎金就需要二十八萬一千,m̄-koh教育部補助ê金額suah kan-taⁿ四萬,若koh加獎牌kap得獎作品集製作等等ê行政事務費用,目前經費就欠三十四萬外(請參考附件一ê預算表)。


頂kuân所講--ê,是gún長期投入ê事工ê孤一項niā-niā,事實上,基金會到今年第三季,就已經拄著財務上ê壓力,目睭金金看,強強beh吊鼎--ah,m̄-tsiah ē koh tī tsit个時tsūn發起募款,ǹg望逐家透過實際的ê捐助,陪伴gún行過死蔭ê山谷。


Tī未來,gún除了繼續ē透過年度例行活動(刊物出版、創作kap研究獎勵、台語詩人大會等等)來推sak母語,gún koh按算beh kā目今上kài長歲壽ê兩份台語文學雜誌《台文通訊》、《台文BONG報》合刊擴大發行,合刊了後,ē有全新ê美編設計kap彩色冊皮,tse雖bóng ē hō͘ gún財務ê擔koh ke khah沉重,m̄-koh為著吸引koh-khah濟人來接觸母語文學ê suí,gún決定beh hua̍h步行向前,tsia-ê計劃,事事項項,lóng需要恁tī財務上kā gún支持。


Gún tī tsia邀請逐家,除了捐款來贊助阿却賞kap基金會ê日常運作,mā做伙來參與合刊改版了後ê台語文學雜誌逐年支出ê認捐,hō͘李江却台語文教基金會tsit隻tī母語ê田園出力無停歇ê老牛,有法度深犂重耙,做出koh-khah大ê貢獻,hō͘ gún繼續為咱ê母語奮鬥拍拚,拜託逐家!!!


最後,向列位兄姊報告,恁ê捐款除了ē-tàng提著thang抵稅ê收據以外,gún mā ē hīng捐款者一寡台語文相關ê禮物(請參考附件二),hō͘咱自由運用,相信無論自用ia̍h送禮,對母語推展來講,lóng是真有意義ê代誌。


Koh一擺感謝逐家一直kā gún熱情贊助tàu支持!希望台灣人kap台灣母語早一日出頭天!


李江却台語文教基金會 總幹事 陳豐惠
副總幹事 劉承賢
敬上


(附件一)
預算表
專案 阿却賞 獎金/稿費 281,000
阿却賞 出席費 40,000
阿却賞 編輯排版設計費 60,000
阿却賞 交通費 20,000
阿却賞 印刷費 46,000
阿却賞 場地費 5,000
阿却賞 餐費 5,000
阿却賞 雜支 20,000
小計   477,000


2011年阿却賞預算金額:477,000,到9/30募款金額:130,000,猶不足347,000。


<附件二>
一、捐一萬--ê 送:
A)〈台語讀(聖)經機隨身聽player〉+《各各他ê目屎-紀福讚牧師文集》(價值$1550),或者是
B)以下a.-j.項目揀四種 (價值超過1600;仝一項thang重複)。
(請選擇揀A 或者是揀B)
二、捐五千,a.-j.項目揀兩項,仝一項beh愛兩份mā ē用--得(逐項價值tī $400以上)
三、捐三千:a-j在咱揀一項。


a.亦宛然布袋戲團〈馬偕在台灣-布袋戲DVD〉+《阿爸ê鹿角薰吹-蕭平治散文集》冊。
b.張岳琳《豆油找親戚》台語囡仔古繪本附CD+《台語這條路-台語文工作者訪談錄》冊。
c.《台文BONG報小說精選輯一》(附兩篇小說CD)+〈海風渡鳥眠夢-陳豐惠1990-2000作品選輯CD〉。
d.《路樹下ê tō͘-peh-á-陳明仁台語小說劇本集》(附一篇小說CD)+《台灣人寫真-台文BONG報
散文選輯》(附部份作品CD)。
e.《2008詩行-台灣母語詩人大會集》(附CD)+《倒轉-劉承賢小說集》。
f.《2009詩行-台灣母語詩人大會集》(附CD)+《無影無跡-藍春瑞小說集》。
g. 蕭平治《輕輕鬆鬆讀台語》附CD+《2010詩行-台灣母語詩人大會集》(附CD)。
h.《胡蠅蚊仔大戰歌-楊秀卿台灣唸歌》高畫質動畫DVD+《生活中ê美感-廖瑞銘作品集》冊。
i. 《2010詩行-台灣母語詩人大會集》(附CD)+ 《2011詩行-台灣母語詩人大會集》(附CD)。
j.《台文通訊》一年份合訂本+《台文BONG報》一年份合訂本各任選一本。


------------捐款意願回條------------------------------------------------------------------


以下項目請勾選(無限一項,請用傳真02-2311-2210、電話02-2311-2199 ia̍h是寫電子批來akhioh@tgb.org.tw報gún知。):


姓名: 電話: 地址:
〇我beh為2011年阿却賞捐款: 。
〇我beh為《台文通訊》、《台文BONG報》合刊出版費用捐款: 。
〇我beh為台語詩人大會計劃捐款: 。
〇我beh為基金會行政事務費捐款: 。
〇我願意加入基金會的定期定額捐款天使:□每月 □每季 □每年 。


以上捐款方式:〇劃撥 〇電匯 〇信用卡 〇支票 〇現金
郵局劃撥口座:1902-1486,華南銀行口座:123-20-050514-2,以上戶名kap支票title(『抬頭』) lóng是
「財團法人李江却台語文教基金會」。Beh用信用卡捐款請填信用卡捐款單仔,寫了傳真ia̍h是寄來基金會。