2015年7月29日 星期三

《臺江臺語文學》第十六期專題徵稿啟事



主題:人情書寫
近來,市面上流行一句話講:「臺灣上媠的風景是人」,對臺灣人ê形象、特質是真熱情ê o-ló,kap中國人tī全世界旅遊新聞報導ê形象拄好形成明顯ê對比,thang講是區別臺灣kap中國ê標誌。文學、藝術、文化、歷史ê主體攏是「人」,記錄人ê各種心情kap人情冷暖、生離死別ê實情是文學藝術創作再現ê主題,人情ê豐富表現會使講是台灣文化光榮ê面相。
臺語文學自來就真要意書寫身邊講臺語ê人,一方面感受著母語所散發--出-來ê友善情感,一方面mā是珍惜in ê母語書寫中所承載ê文化特質。文學是咱kap身邊ê人ê對話,咱第十六期就用「人情書寫」做專題,歡迎眾文友kā你所知ê台灣人寫真、互動ê情感,化做創作kap相關主題ê文學論評分享hōo逐家。
第十六期是 2015年11月初 5出版,11月15上市,9月20截稿。
本雜誌屬臺語文學刊物,便若屬臺語文學作品,無論詩、散文、戲劇(上濟 5000 字)、小說(上濟 10000 字)、七字仔(有故事性 ê 歌謠)、囡仔歌詩 kap 文學賞析、文學評論(上濟 5000 字)等,攏歡迎投稿,投稿請盡量附作者生活相片、無版權問題ê相關圖片kap 簡要ê 圖片說明文字。
內容包含 word 檔案一份 kap pdf 檔案一份,嘛請填寫作者資料表:姓名、單位、職稱、電話、e-mail、通訊地址 kap50 字以內 ê 作者簡介,以 e-mail 傳到taikangtaigi@gmail.com,主旨註明「投稿臺江臺語文學」。