2014年3月12日 星期三

【台灣教會公報3236期報導】微調獨裁 人民要有決心改變


微調獨裁 人民要有決心改變

【特稿/郭燕霖】2012年,美國William J. Dobson 出版一本冊《T h e Dictator's Learning Curve: Inside the Global Battle for Democracy》,內容是紹介獨裁者如何學習進化以及透過假民主手段收編kap分化民眾,真歡喜左岸出版社發行華文版本,本文透過這本冊觀點來分析馬英九政權如何微調高中課綱kap台派如何反制危調課綱。

教育部為配合馬英九政權kap王曉波意識形態,甘願放棄教育專業,變chiâⁿ做中國「統戰部」,危調部分是khiā中國立場寫台灣史,所以這部分修改完成課綱tō是「中據」課綱,證明中華民國無法度佇台灣本土化,反倒轉台灣會中國化,這部分是支持李登輝ê群眾ài思考ê問題。

台派反制危調課綱ài用心去思考王曉波危調部分,可比講in講日本「殖民」台灣,教師thang引chhōa學生思考中華民國流亡政府如何「殖民」「佔領」台灣;為何「皇民化」教育是奴隸思想,「中民化」教材(中華文化基本教材必修、65%文言文教材)m̄ 是奴化教材leh?Tàn問題hō͘學生思考,一點sûi通,當然盲從者一定有,可是台派運用URM(城鄉宣教運動)訓練技巧微調府城湯德章公園孫文銅像小可「小確幸」,民主獨裁者khioh恨佇心內mā無伊法度。

Khah麻煩是40歲以上ê台灣人,這部分台灣人思想釘根佇戒嚴時期,雖然目前無戒嚴,但是in無法度解放獨裁毒素,ài透過《KANO》、《海角七號》電影解除戒嚴思想,這部分猶太人作法值得咱學習。猶太人為去除Nazi餘毒,每一年至少phah一齣電影喚起普羅大眾注意,電影不一定嚴肅,ē-tàng是愛情、科幻片,影片內底看pān 摻一寡獨裁者壓迫受害者劇情,微調人民受獨裁毒素。魏德聖導演雖然無明確宣示,但是伊ê「用心」,假民主真獨裁者mā知影,ē調整策略反制,所以台灣需要koh khah chē ê魏德聖導演,《KANO》導演馬志翔值得台派期待kap牽成。

烏克蘭總統Yanukovych佇烏克蘭人民運用URM策略下推翻,烏克蘭 ē-tàng咱mā ē-tàng,問題是咱台灣人有決心kap願意改變無?若民進黨beh凍結台獨黨綱交換去中國交流,是毋是台派無條件繼續支持民進黨?Beh微調獨裁者想法kap約束伊出賣人民,唯一方法是人民比獨裁者khah團結、認真,咱準備好bōe?「本冊hō͘人希望卻無過度樂觀」,William J. Dobson,阮聽著啊!

沒有留言:

張貼留言

注意:只有此網誌的成員可以留言。

台文通訊BONG報

台文通訊BONG報 https://tsbp.tgb.org.tw