2014年3月26日 星期三

2013【阿却賞】台語文學研究(論文)研究生組─曾瓊珠



台語文學研究(論文)研究生組

曾瓊珠 簡介

頭一擺 接觸台語文學

頭一擺 研究台語現代詩

頭一擺 用台語寫論文

頭一擺 對台語ê發展有真濟感慨

是按怎

台語tsit條路tsiah歹行

台語復興運動ê史頁掀--開

走揣前人一步一跤印ê痕跡

Tsiah知台語若beh huah出聲

Ē去拄著阻礙ê刺苓仔規山坪

勇敢孤單前進ê形影

用台語現代詩

寫出被壓制kap痛苦ê心聲

一塊一塊ê詩

Lóng是一tsân一tsân ê事件

Lóng是見證歷史ê縮影

Lóng是前行者流血流汗拍拚所留ê跤跡

Khioh做伙 接做伙

Tsiah ē-tàng成(tsiâⁿ)做歷史長河ê水流



傳hō͘後代免驚惶

勇敢huah出台語ê大名


拄頭仔ê時,認為網路資源豐富,蒐集資料是真簡單ê代誌,想bē到liâu--落-去了後tsiah知困難重重,所拄著ê困境可能kan-taⁿ家己tsiah體會ē著。譬論講:名存實亡ê資料:《菅芒花詩刊》
第1-3期kan-taⁿ埔里圖書館有,m̄-koh去到現場連管理員mā揣bē著實冊tī佗位,中山大學kap真理大學ê《台灣鄉土雜誌》創刊號-第11期mā是有仝款ê情形,tse lóng是ài等kah走揣資料ê人去到現場tsiah ē知影koh無奈,拄--著ê時ē hō͘人真失志。

台語現代詩專集kap選集tī圖書館內底是hō͘人分囥tī真濟別種冊類ê內底,有ê對冊皮是看bē出伊是用台語寫--ê,有tang時一本內底tsiah收錄一塊詩,tio̍h-ài了真濟時間去tshiau揣--出-來。Tsit款四散掖ê情形,好佳哉有台灣羅馬字協會ê走tsông,tsiah得著改善。

台語ê一个大阻礙就是倉頡滿sì-kuè,尤其是1990年代ê作品是tī百家爭鳴ê背景下產出--ê,情形特別嚴重。親像陳昭誠ê用字,真濟是台語字典揣無、電腦mā拍bē出來--ê,tī資料beh電腦化、讀者kap研究者beh認bat ê時ē產生真大ê困擾,mā ē延遲著台語推sak ê速度。

台語所寫ê資料無電子化真無方便,而且大部分ê雜誌kap詩刊lóng bē-tàng借出來研究。親像成功大學ê台語資料保存量真濟koh完整,M̄-koh lóng bē-tàng借--出-來,所以逐擺lóng ài透早出門,屈tī內底一直到人beh關門,連中晝頓to m̄甘làng縫去食,三更半暝tsiah轉去到南投,去台灣文學館、靜宜大學-tsiok濟有收藏ê所在lóng是án-ne。走揣kah bē得著ê資料,目睭金金看伊hông銷毀,透過各種ê方法lóng無法度

去挽救,hit款痛疼kap凝心是無法度形容--ê。親像《台語世界》hō͘豐原圖書館銷毀掉ê時,hō͘人ê心tsiok疼tsiok疼--ê。好佳哉!Tī蒐集台語現代詩ê過程中所拄--著ê困境,受著何博士信翰、方博士耀乾、楊博士允言、作者潘靜竹等前輩一再幫贊kap鼓勵,tsiah有勇氣繼續向前行。台語tsit條路雖講真歹行,身為台語人,保存台語、推sak台語是lán bē-tàng推辭ê使命。