2014年3月31日 星期一

2013【阿却賞】台語文學研究(論文)大學生組─陳雅文


台語文學研究(論文)大學生組

陳雅文 簡介

學生陳雅文,二十一歲,tī高雄市出世,我生長tī一个樸實ê家庭,厝內成員有五个,爸母lóng teh上班,小弟kap小妹讀高中。Tī我細漢ê時,爸母逐工外出做工作,細膩仔照顧guán大漢;tī師長眼中,我是一个守本分、做代誌認真ê學生。Tī guán班,我tiāⁿ幫助有困難ê同學。Tī同伴目睭內,是一个熱心、好鬥陣ê朋友。因為我做代誌ê態度認真,所以tī學校不時擔任幹部。學習知識來講,我愛向老師請教課堂問題ia̍h是hām同學討論分享,tse有養成我積極主動、堅強熱心ê個性。

透過參加系上活動kap創作研究,我為beh培養家己ê寫作實力,參加系上第四屆紫荊文學獎比賽得著醫學人文散文組佳作,也bat tī《台文BONG報》投稿新詩作品。Tī研究方面,除了各學科報告ê撰寫,我mā tī今年ê 2--月提出國科會大專生論文計畫ê申請,tī 7--月得著核准通過資格,目前已經開始執行研究計畫。

我本身是台文系畢業,對台灣規个文化kap歷史傳承有tsiok厚ê感情,所以tī今年2013年10--月投稿李江卻台語文教基金會所舉辦ê「台語文學創作kap研究」,論文題目是「台語招牌ê分布情形研究-以台中市南屯區為例」,uì內底觀察台灣語言--裡,文化流動、多元濫摻kap歷史傳承ê意義,hō͘我得著真寶貴ê智識。