2012年7月9日 星期一

【看世事講台語】坐轎無人知,騎馬較囂俳



編輯 / 黃能揚、李江却台語文教基金會 陳豐惠 劉承賢


標題:資料網路蓋好揣 圖書館利用率變低
Tsu-liāu bāng-lōo kài hó tshuē, tôo-su-kuán lī-iōng-lu̍t piàn kē.
(華語)上網便利找資料 圖書館利用率變低

標題:正修行動圖書館 鼓勵學生利用資源
Tsìng-siu hîng-tōng tôo-su-kuán, kóo-lē ha̍k-sing lī-iōng tsu-guân.
(華語)正修行動圖書館 鼓勵學生多閱讀

標題:用車載冊起平台 提升效率有事使
Īng tshia tsài tsheh khí pîng-tâi, thê-sing hāu-lu̍t ū-sū-sái.
(華語)打造書車建平台 提升學生學習效率

註:「有事使」(ū-sū-sái):有效果、有路用。
 
 
諺語:坐轎無人知,騎馬較囂俳

Tsē kiō bô lâng tsai, khiâ bé khah hiau-pai.

坐轎的人佇轎的內底,外口的人看袂著,若騎馬是懸懸坐踮馬的頂懸,真顯目佇咧。這句話原底是講,人若讀冊讀甲真飽,煞無對國家社會有貢獻,按呢,學問閣較gâu,嘛是無人會知影。咱想較闊咧,圖書館就親像一个學問的寶庫,毋過,若無人替伊推銷,予人知影伊的利便,嘛予人有濟濟管道得著伊的幫贊,按呢,敢毋是嘛親像有學問的人藏佇轎內底,無法度服務逐家咧?!
 
 
 
資訊時代

Tsu-sìn sî-tāi

學生的學習習慣
Ha̍k-sing ê ha̍k-si̍p si̍p-kuàn

嘛咧改變
Mā leh kái-piàn


(正修科大學生)

(會去圖書館抑是用網路?)
Ē khì tôo-su-kuán ia̍h-sī īng bāng-lōo

會用網路neh
Ē īng bāng-lōo neh

因為網路的空間(資料量)較大
In-uī bāng-lōo ê khong-kan(tsu-liāu liōng)khah tuā

也是網路啊
Iā-sī bāng-lōo- -ā

圖書館感覺愛閣píng冊
Tôo-su-kuán kám-kak ài koh píng tsheh


網路的使用無空間限制
Bāng-lōo ê sú-iōng bô khong-kan hān-tsè

袂少學生拄著問題
Bē-tsió ha̍k-sing tú-tio̍h būn-tê

攏選擇直接上網查資料
Lóng suán-ti̍k ti̍t-tsiap tsiūnn-bāng tshâ tsu-liāu

避免走圖書館的麻煩
Pī-bián tsáu tôo-su-kuán ê mâ-huân

這嘛予圖書館的使用率愈來愈低
Tse mā hōo tôo-su-kuán ê sú-iōng-lu̍t jú-lâi-jú kē


正修科大為著提升校園讀冊的風氣
Tsìng-siu Kho-tāi uī-tio̍h thê-sing hāu-hn̂g tha̍k-tsheh ê hong-khì

特別製造一台
Ti̍k-pia̍t tsè-tsō tsi̍t-tâi

歐洲宮廷馬車造型的行動冊車
Au-tsiu kiong-tîng bé-tshia tsō-hîng ê hîng-tōng tsheh-tshia

逐日佇校園濟人聚集的所在巡迴
Ta̍k-ji̍ttī hāu-hn̂g tsē lâng tsū-tsi̍p ê sóo-tsāi sûn-huê

予學生借冊閣較方便
Hōo ha̍k-sing tsioh tsheh koh-khah hong-piān


(正修科大圖書資訊處處長 施文玲)

目前(車頂)倚半冬來的好市冊
Bo̍k-tsiân(tshia-tíng)uá puànn-tang lâi ê hó-tshī-tsheh

捌試營運 佇一點鐘內
Bat tshì îng-ūn tī tsi̍t tiám-tsing lāi

一百本攏總借了了
Tsi̍t-pah pún lóng-tsóng tsioh liáu-liáu


(正修科大學生)

(敢會增加你去看冊的意願?)
Kám-ē tsing-ka lí khì khuànn-tsheh ê ì-guān

這喔 可能若有經過遐會看一下啦
Tse- -ooh, khó-lîng nā-ū king-kuè hia ē khuànn- -tsi̍t-ē-lah


行動冊車敢會當提升
Hîng-tông tsheh-tshia kám ē-tàng thê-sing

實體冊的讀冊風氣
Si̍t-thé tsheh ê tha̍k-tsheh hong-khì

閣愛觀察
Koh ài kuan-tshat

毋過另外一方面學校嘛開幾若百萬
M̄-koh līng-guā tsi̍t hong-bīn ha̍k-hāu mā khai kuí-nā pah-bān

建置圖書資訊的行動通訊平台
Kiàn-tì tôo-su tsu-sìn ê hîng-tōng thong-sìn pênn-tâi

未來閣會增加內容
Bī-lâi koh ē tsing-ka luē-iông

包括校園演講
Pau-kuat hāu-hn̂g ián-káng

甚至是老師上課的錄影資料攏會上網
Sīm-tsì sī lāu-su siōng-khò ê lo̍k-iánn tsu-liāu lóng-ē tsiūnn-bāng

學生若登錄家己的學號
Ha̍k-sing nā ting-lo̍k ka-kī ê ha̍k-hō

就會當隨時查資料
Tō ē-tàng suî-sî tshâ tsu-liāu

利用虛擬行動圖書館
Lī-iōng hi-gí hîng-tōng tôo-su-kuán

欲提升學生的學習效率
Beh thê-sing ha̍k-sing ê ha̍k-sip hāu-lu̍t