2012年4月9日 星期一

【看世事講台語】放緄仔釣大尾魚



編輯 / 黃能揚、李江却台語文教基金會 陳豐惠、劉承賢



標題:投資一千萬 綠能雞牢蓋台灣
Tâu-tsu tsi̍t-tshing bān, li̍k-lîng ke-tiâu kài Tâi-uân.
(華語)斥資千萬 興建全台首座綠能雞舍

註:蓋(kài):華語意為『超越』,例:蓋世、蓋天下。


標題:太陽能雞牢人呵咾 袂翕袂寒閣環保
Thài-iông-lîng ke-tiâu lâng o-ló, bē hip bē kuâⁿ koh khuân-pó.
(華語)雲林太陽能雞舍 冬暖夏涼省能環保

註:翕(hip):華語意為『悶熱』。


標題:一冬回收十份一 十年就會拍平直
Tsi̍t tang huê-siu tsa̍p-hūn-tsi̍t, tsa̍p tang tō ē phah-pênn-ti̍t..
(華語)雞舍自給供電 餘電可賣十年回本



諺語:放緄仔釣大尾魚

Pàng kún-á tiò tuā-bué hî

緄仔是長度蓋長ê釣線,放緄仔是kā長線放去甲遠遠遠ê所在,沉入去深水底,按呢,就干焦大魚才食會著。這款釣法,佮一般攑釣篙咧釣ê方式無仝。這句諺語ê意思佮華語ê『放長線釣大魚』sio-siâng。雞牢ê主人,毋若是看十冬後設備成本會當回收,佮he了後賣電另外ê收入,裝太陽能發電,對土地ê好處,是閣較久長--ê,hit个利益是閣較大--ê。
 
 
行入去鐵厝內底

Kiânn ji̍p-khì thih-tshù lāi-té

欲倚三百外坪大的雞牢
beh-uá sann-pah guā phîng tuā ê ke-tiâu

飼上千隻的雞
tshī tsiūnn tshing tsiah ê ke

毋過行到雞牢外面
m̄-koh kiânn kàu ke-tiâu guā-bīn

看彼厝頂
khuànn he tshù-tíng

一塊閣一塊的太陽能枋
tsi̍t-tè koh tsi̍t-tè ê thài-iông-lîng pang

整齊排囥佇厝頂
tsíng-tsê pâi khǹg tī tshù-tíng



這是全台灣第一座
Tse sī tsuân Tâi-uân tē-it tsō

家己會發電的多功能雞牢
ka-kī ē huat-tiān ê to-kong-lîng ke-tiâu


雲林養雞戶 鄧進勝

用太陽能發電
Īng thài-iông-lîng huat-tiān

是一項上環保上清氣
sī tsi̍t-hāng siōng khuân-pó siōng tshing-khì

的發電方式
ê huat-tiān hong-sik

我配合政府這个綠能政策
guá phuè-ha̍p tsìng-hú tsit-ê li̍k-lîng tsìng-tshik
這个好的政策
tsit-ê hó ê tsìng-tshik

所以我接受用我的厝頂去做試驗
sóo-í guá tsiap-siū īng guá ê tshù-tíng khì tsò tshì-giām

結果tsit-má試驗了
kiat-kó tsit-má tshì-giām liáu

我感覺講足好
guá kám-kak kóng tsiok hó


蹛附近的雞農表示
Tuà hù-kīn ê ke-lông piáu-sī

一開始無相信會當kā家己的雞牢厝頂
tsi̍t khai-sí bô siong-sìn ē-tàng kā ka-kī ê ke-tiâu tshù-tíng

打造太陽能
tá-tsō thài-iông-lîng

雖然太陽能枋並無俗
sui-jiân thài-iông-lîng pang pīng-bô sio̍k

但是這座太陽能逐年會用得生產12萬度的電
tān-sī tsit tsō thài-iông-lîng ta̍k-nî ē-īng-tit sing-sán tsa̍p-jī-bān tōo ê tiān

一年閣會用得賣電予台電上百萬
tsi̍t nî koh ē-īng-tit bē tiān hōo Tâi-tiān tsiūnn pah-bān

大約十年的時間就會當回本
tāi-iok tsa̍p-nî ê sî-kan tō ē-tàng huê-pún

閣有寒天會用鐵架來擋風
koh-ū kuânn-thinn ē īng thih-kè lâi tòng hong

熱天嘛thang降低雞牢溫度
jua̍h-thinn mā thang kàng-kē ke-tiâu un-tōo

幫贊真大
pang-tsān tsin tuā


雲林養雞戶 鄧進勝

因為伊厝頂換這个塑鋼
In-uī i tshù-tíng uānn tsit-ê sok-kǹg

塑鋼的落去
sok-kǹg–ê lo̍h–khì

伊塑鋼是雙層中空隔熱
i sok-kǹg sī siang-tsân tiong-khong keh-jia̍t

又閣光電枋閣鋪落去
iū-koh kng-tiān-pang koh phoo--lo̍h-khì

閣加一沿的隔熱
koh ke tsi̍t-iân ê keh-jia̍t

所以熱天雞仔會加真好飼
sóo-í jua̍h-thinn ke-á ē ke tsin hó-tshī

溫度上少降有四度啦
un-tōo siōng tsió kàng ū sì tōo--lah

啊寒天溫度會較懸
Ah kuânn-thinn un-tōo ē khah kuân



雞牢主人鄧先生嘛講
Ke-tiâu tsú-lâng Tīng--sian-sinn mā kóng

因為雲林是全台灣日炤時間上長的縣市
in-uī Hûn-lîm sī tsuân Tâi-uân ji̍t-tshiō sî-kan siōng tn̂g ê kuān-tshī

毋才會想講kā三百外坪大的雞牢改做運用太陽能來發電
m̄-tsiah ē siūnn-kóng kā sann-pah guā phîng tuā ê ke-tiâu kái-tsò ūn-iōng thài-iông-lîng lâi huat-tiān

毋但thang減少飼雞的耗能
m̄-nā thang kiám-tsió tshī-ke ê hàu-lîng

降低飼雞的成本
kàng-kē tshī-ke ê sîng-pún

嘛會用得為環保盡一寡心力
mā ē-īng-tit uī khuân-pó tsīn tsi̍t-kuá sim-li̍k