2012年3月16日 星期五

【看世事講台語】也欲好 也欲蕃藷生坦倒



編輯 / 李江却台語文教基金會 陳豐惠、劉承賢、黃能揚



標題:考軍校有限定 人權團體講無平正
Khó kun-hāu ū hān-tiānn, jîn-khuân thuân-thé kóng bô pênn-tsiànn.
(華語)軍校招生設條件 人權團體抨歧視

註:平正(pênn-tsiànn):公正


標題:軍校設條件招生 勞委會無贊成
Kun-hāu siat tiâu-kiānn tsio-sing, Lô-uí-huē bô tsàn-sîng.
(華語)軍校招生設限 勞委會不以為然


標題:國防部招生檢討 人權戰力顧齊著
Kok-hông-pōo tsio-sing kiám-thó, jîn-khuân tsiàn-li̍k kòo tsiâu-tio̍h.
(華語)國防部檢討招生 兼顧人權與戰力

 諺語:也欲好,也欲蕃藷生坦倒。

Iā beh hó, iā beh han-tsî senn thán-tó.

「欲好」是希望物件好ê意思;「生坦倒」是講生湠甲真厚,規塗跤滿滿是,收成真好ê意思。規个意思是咧講人ê心理,彼款好欲閣較好,毋但這位好,別位嘛欲好。就親像咱ê社會,一方面希望軍人身體健康、體格勇壯,通保衛(pó-uē)國家;一方面閣要求就業公平,袂使設條件限制,逐項攏欲顧甲齊著(tsiâu-tio̍h),實在講,有影真艱計(kan-kè;「困難」ê意思)。

 
軍校是職業軍人養成的管道

Kun-hāu sī tsit-gia̍p kun-jîn ióng-sîng ê kuán-tō

所以軍校招生毋但是單純的升學考試
sóo-í kun-hāu tsio-sing m̄-nā sī tan-sûn ê sing-ha̍k khó-tshì

嘛是軍人選用的管道之一
mā-sī kun-jîn suán-iōng ê kuán-tō tsi-it

毋過軍校招生的規定是明文限制講
m̄-koh kun-hāu tsio-sing ê kui-tīng sī bîng-bûn hān-tsè kóng

色盲、兩爿的卵巢抑是膦核切除的考生袂使來報考
sik-bông, nn̄g-pîng ê nn̄g-tsâu ia̍h-sī lān-hu̍t tshiat-tû ê khó-sing bē-sái lâi pò-khó

中正預校閣限制14到18歲
Tiong-tsìng Ū-hāu koh hān-tsè tsa̍p-sì kàu tsa̍p-peh huè

單身男性才會使來考
tan-sin lâm-sìng tsiah ē-sái lâi khó

引起性別人權團體的抗議
ín-khí sìng-pia̍t jîn-kuân thuân-thé ê khòng-gī.

認為侵害著人民工作權佮受教育的權利
jīn-uî tshim-hāi tio̍h jîn-bîn kang-tsok kuân kap siū kàu-io̍k ê kuân-lī



台北市女性權益促進會

常務理事 李兆環

這明顯有性別歧視
Tse bîng-hián ū sìng-pia̍t kî-sī

佮歧視女性按呢的情形
kap kî-sī lú-sìng án-ne ê tsîng-hîng

毋但違反憲法第七條的平等權
m̄-nā uî-huán Hiàn-huat tē-tshit tiâu ê pîng-tíng kuân

也會影響著學生
iā ē íng-hióng tio̍h ha̍k-sing

男性女性學生的受教權
lâm-sìng lú-sìng ha̍k-sing ê siū-kàu kuân

甚至最後的工作權
sīm-tsì tsuè-āu ê kang-tsok kuân



國防部軍醫局醫保處

代處長 楊榮木

有的部隊佇足偏遠的地區
Ū ê pōo-tuī tī tsiok phian-uán ê tē-khu

阮希望招募遮的人入來的時陣
guán hi-bāng tsio-bōo tsia-ê lâng ji̍p–lâi ê sî-tsūn

咱袂使kā 遮的人擲去偏遠地區
lán bē-sái kā tsia-ê lâng tàn khì phian-uán tē-khu

予伊無法度得著好的醫療照顧
hōo i bô-huat-tōo tit-tio̍h hó ê i-liâu tsiàu-kòo

來影響軍事任務
lâi íng-hióng kun-sū jīm-bū

所以阮猶是愛有一寡限制
sóo-í guán iáu-sī ài ū tsi̍t-kuá hān-tsè



軍方強調有戰備的考量
Kun-hong kiông-tiāu ū tsiàn-pī ê khó-liōng

毋過勞委會表示
m̄-koh Lô-uí-huē piáu-sī

根據就業服務法第五條的規定
kun-kù Tsiū-gia̍p Ho̍k-bū-huat tē-gōo tiâu ê kui-tīng

除非其他法律有明文的規定
tû-hui kî-tha huat-lu̍t ū bîng-bûn ê kui-tīng

若無,袂當用性別抑是身心障礙等等的理由
nā-bô, bē-tàng īng sìng-pia̍t ia̍h-sī sin-sim tsiòng-gāi tíng-tíng ê lí-iû

來影響就業的平等機會
lâi íng-hióng tsiū-gia̍p ê pîng-tíng ki-huē.



勞委會職訓局就服組

副組長 沈文麗

若國防部認為
Nā Kok-hông-pōo jīn-uî

伊的性別抑是面容遮的
i ê sìng-pia̍t ia̍h-sī bīn-iông tsia–ê

有必要去做一寡限制
ū pit-iàu khì tsò tsi̍t-kuá hān-tsè

嘛麻煩國防部愛去列出
mā mâ-huân Kok-hông-pōo ài khì lia̍t-tshut

伊(做遮的限制)的法律位階
i(tsò tsia-ê hān-tsè)ê huat-lu̍t uī-kai

抑是法律授權等等的相關規定
ia̍h-sī huat-lu̍t siū-kuân tíng-tíng ê siong-kuan kui-tīng



國防部路尾表示
Kok-hông-pōo lōo-bué piáu-sī

會kā各界意見紮轉去思考
ē kā kok-kài ì-kiàn tsah tńg-khì su-khó

看有欲來修改相關的軍校招生規定無
khuànn ū beh lâi siu-kái siong-kuan ê kun-hāu tsio-sing kui-tīng–bô

希望會使揣著兼顧人權佮
hi-bāng ē-sái tshuē-tio̍h kiam-kòo jîn-kuân kap

國軍戰力的解決方案
kok-kun tsiàn-li̍k ê kái-kuat hong-àn.