【看世事講台語】三廳官袂辦得家內事

台語編輯 / 李江却台語文教基金會、黃能揚


標題：家內事嘛會得判決 立法院通過“家事法
Ke-lāi-sū mā ē-tit phuànn-kuat, Li̍p-huat-īnn thong-kuè Ka-sū-hua.
(華語)清官可斷家務事 "家事法"立法通


標題：辦家內事有法律通用 婦女團體肯定
Pān ke-lāi-sū ū huat-lu̍t thang īng, hū-lú thuân-thé khíng-tīn.
(華語)"家事法"專法規範 婦團表達肯定

標題：家事服務中心著設立 諮詢轉介才會直
Ka-sū Ho̍k-bū Tiong-sim tio̍h siat-li̍p, tsu-sûn tsuán-kài tsiah ē ti̍t.
(華語)籲速設家事服務中心 提供諮詢轉介

註：「直」：華語『得到整頓、平息、清楚』。



諺語：三廳官袂辦得家內事。

Sann thiann kuann bē pān-tit ke-lāi-sū.

華語ê『清官難斷家務事』，台語嘛有一句相對應ê俗語，號做「三廳官袂辦得家內事」。三廳官是表示有三个官廳ê官員ê意思，就是古早講ê「三司會審」（sam-si huē-sím），表示tsit个審判真點陳（tiám-tîn）、真斟酌，毋過，就準是tsiah-nī仔慎重（sīn-tiōng），都嘛無才調kā家內事會（huē）予明，tsit句俗語是毋是kā tsit款情形講kah真tshenn真活跳–l
 
 
 
藝人王靜瑩佮前翁陳威陶

Gē-jîn Ông Tsīng-îng kap tsîng-ang Tân Ui-tô

往過為著離婚（離緣）
íng-kuè uī-tio̍h lī-hun（lī-iân）

房地產佮囡仔監護權的問題
pâng-tē-sán kap gín-á kàm-hōo-kuân ê būn-tê

一直去法院拍官司
it-ti̍t khì huat-īnn phah-kuann-si


親像這種為著家庭糾紛
Tshin-tshiūnn tsit tsióng uī-tio̍h ka-tîng kiù-hun

佇咧法庭走傱
tī-leh huat-tîng tsáu-tsông

是袂少婦女定定拄著的難題
sī bē-tsió hū-lú tiānn-tiānn tú–tio̍h ê lân-tê

猶毋過這馬家事事件法通過了後
iáu-m̄-koh tsit-má Ka-sū-sū-kiānn-huat thong-kuè liáu-āu

未來親像是離婚
bī-lâi tshin-tshiūnn sī lī-hun

親屬關係確認佮繼承的案件
tshin-sio̍k kuan-hē khak-jīn kap kè-sîng ê àn-kiānn

攏會當合併
lóng ē-tàng ha̍p-pìng

由仝一个法官審理
iû kâng tsi̍t-ê huat-kuann sím-lí

這種法令通過
tsit-tsióng huat-līng thong-kuè

誠濟婦女團體攏表達肯定
tsiânn-tsē hū-lú thuân-thé lóng piáu-ta̍t khíng-tīng.


女人連線秘書長 蔡宛芬

過去離婚官司佮監護權官司
Kuè-khì lī-hun kuann-si kap kàm-hōo-kuân kuann-si

著愛分開來處理
tio̍h-ài hun-khui lâi tshú-lí

彼其實對濟濟婦女來講
he kî-si̍t tuì tsē-tsē hū-lú lâi kóng

是一款折磨
sī tsi̍t khuán tsiat-buâ

這馬kā伊合併審理
tsit-má kā i ha̍p-pìng sím-lí

由仝一个法官來判定
iû kâng tsi̍t ê huat-kuann lâi phuànn-tīng

我想這對未來
guá siūnn tse tuì bī-lâi

婦女咧爭取離婚抑是監護權
hū-lú leh tsing-tshú lī-hun ia̍h-sī kàm-hōo-kuân

遮的權益的部份
tsia-ê kuân-ik ê pōo-hūn

會較有保障
ē khah ū pó-tsiòng


婦女團體拺十八年的家事事件法
Hū-lú thuân-thé sak tsa̍p-peh nî ê Ka-sū-sū-kiānn-huat

總算立法通過
tsóng-sǹg li̍p-huat thong-kuè

除了明訂家事訴訟事件會當合併處理
tû-liáu bîng-tīng ka-sū sòo-siōng sū-kiānn ē-tàng ha̍p-pìng tshú-lí

也建立社工陪伴佮家事調查官的制度
iā kiàn-li̍p siā-kang puê-phuānn kap Ka-sū-tiau-tsa-kuann ê tsè-tōo

扮演當事人佮法院的橋樑
pān-ián tong-sū-jîn kap huat-īnn ê kiô-niû

猶毋過婦女團體認為
iáu-m̄-koh hū-lú thuân-thé jīn-uî

法令猶有不足的所在
huat-līng iáu ū put-tsiok ê sóo-tsāi

親像調解法官佮審判法官
tshin-tshiūnn tiau-kái huat-kuann kap sím-phuànn huat-kuann

就應該明訂袂使仝一个人
tō ìng-kai bîng-tīng bē-sái kâng tsi̍t ê lâng


婦女新知基金會培力部 主任 陳玫儀

真濟法官猶是會引用
Tsin-tsē huat-kuann iáu-sī ē ín-iōng

佇調解過程中的說明佮讓步
tī tiau-kái kuè-thîng tiong ê sueh-bîng kap niū-pōo

成做伊的審判根據
tsiânn-tsò i ê sím-phuànn kun-kù

按呢會造成當事人伊
án-ne ē tsō-sîng tong-sū-jîn i

毋敢佇調解過程中
m̄-kánn tī tiau-kái kuè-thîng tiong

欲講啥就講啥
beh kóng siánn tō kóng siánn

抑是kā伊的心情、意見、感受
ia̍h-sī kā i ê sim-tsîng, ì-kiàn, kám-siū

佇彼款場表現出來
tī hit khuán tiûnn piáu-hiān–tshut-lâi


大多數的婦女團體也共同提出應該趕緊
Tāi-to-sòo ê hū-lú thuân-thé iā kiōng-tông thê-tshut ìng-kai kuánn-kín

佇咧法院設立家事服務中心
tī-leh huat-īnn siat-li̍p ka-sū ho̍k-bū tiong-sim

予當事人會當得著多元化的諮詢
hōo tong-sū-jîn ē-tàng tit-tio̍h to-guân-huà ê tsu-sûn

佮資源轉介服務
kap tsu-guân tsuán-kài ho̍k-bū

予法院真正是為服務人民來存在
hōo huat-īnn tsin-tsiànn sī uī ho̍k-bū jîn-bîn lâi tsûn-tsāi