【看世事講台語】貪伊一斗米 失去半年糧

台語編輯 / 李江却台語文教基金會



標題：毋免簽證去旅遊 別項簽證變遷手
M̄-bián tshiam-tsìng khì lú-iû, pa̍t-hāng tshiam-tsìng piàn tshiân-tshiú.
(華語) 多國旅遊免簽證 他類簽證更麻煩
註：遷手（tshiân-tshiú）：費氣、麻煩


立委要求外交部 在台簽證毋通無
Li̍p-uí iau-kiû Guā-kau-pōo, tsāi Tâi tshiam-tsìng m̄-thang bô.
(華語) 立委要求外交部 恢復在台簽證


簽證敢顛倒費氣 外交部做伙考慮
Tshiam-tsìng kám tian-tò huì-khì, Guā-kau-pōo tsò-hué khó-lī.
(華語) 國人簽證方便性 外部將通案考量
 
 
貪伊一斗米，失去半年糧

Tham i tsi̍t táu bí, sit-khì puànn-nî niû

原本向外國爭取旅遊免簽證，是為著beh利便民眾，結果，suah顛倒hōo自本tī台灣有做簽證業務ê國家長長短短取消服務，民眾 beh 留學、tī 國外食頭路等等 ê 特殊簽證業務，自按呢變歹辦，想想–leh，tse 爭取免簽證待遇到底敢算會和（hô），值得外交部進一步來思考，並且為民眾來爭取、拍算。
 
 
中華民國一百年

Tiong-huâ-bîn-kok tsi̍t-pah nî

外交部推動的百國免簽證已經達成
Guā-kau-pōo tshui-tōng ê pah kok bián tshiam-tsìng í-king ta̍t-sîng

嘛一直予馬政府認為是重要的政績
mā it-ti̍t hōo Má-tsìng-hú jīn-uî sī tiōng-iàu ê tsìng-tsik

毋過民眾享受著免簽證的優惠
m̄-koh bîn-tsiòng hiáng-siū tio̍h bián tshiam-tsìng ê iu-huī

想袂到煞嘛產生無利便的另外一面
siūnn-bē-kàu suah mā sán-sing bô lī-piān ê līng-guā tsi̍t bīn

可比講Sweden（瑞典）、Canada（加拿大）
khó-pí kóng Suī-tián, Ka-ná-tāi

因為提供免簽證
in-uī thê-kiong bián tshiam-tsìng

已經撤走駐台辦事處的簽證人力
í-king thiat-tsáu tsū Tâi pān-sū-tshù ê tshiam-tsìng jîn-li̍k

民眾若需要申請工作簽證
bîn-tsiòng nā su-iàu sin-tshíng kang-tsok tshiam-tsìng

移民簽證 抑是學生簽證
î-bîn tshiam-tsìng, iah-sī ha̍k-sing tshiam-tsìng

可能愛上網辦理
khó-lîng ài tsiūnn-bāng pān-lí

抑是走去香港辦事處
iah-sī tsáu khì Hiong-káng pān-sū-tshù

真無方便
tsin bô hong-piān


*蔡煌瑯 民進黨籍立法委員

予國民免簽證的時
Hōo kok-bîn bián tshiam-tsìng ê sî

伊(政府)「講好 無講bái」
i （tsìng-hú）“kóng hó bô kóng bái”

無kā會造成國民困擾
bô kā ē tsō-sîng kok-bîn khùn-jiáu

增加負擔 增加成本的
tsing-ka hū-tam, tsing-ka sîng-pún–ê

甚至著愛去香港辦簽證
sīm-tsì tio̍h-ài khì Hiong-káng pān tshiam-tsìng

按呢的狀況
án-ne ê tsōng-hóng

清楚予國民知
tshing-tshó hōo kok-bîn tsai


*羅淑蕾 國民黨籍立法委員

猶未舞清楚
Iáu-buē bú tshing-tshó

就趕緊kā國民宣布
tō kuánn-kín kā kok-bîn suan-pòo

害人真正欲辦簽證的
hāi lâng tsin-tsiànn beh pān tshiam-tsìng–ê

揣無著去佗位辦
tshuē-bô tio̍h khì tó-uī pān

想袂到享受著免簽證的優惠
Siūnn-bē-kàu hiáng-siū tio̍h bián tshiam-tsìng ê iu-huī

煞嘛無利便
suah mā bô lī-piān

立委就質疑外交部為著欲搶功勞
li̍p-uí tō tsit-gî Guā-kau-pōo uī-tio̍h beh tshiúnn kong-lô

佇咧免簽證的政策
tī-leh bián tshiam-tsìng ê tsìng-tshik

報好的 無報bái的
pò hó–ê bô pò bái–ê

要求外交部愛交涉
iau-kiû Guā-kau-pōo ài kau-sia̍p

恢復國民佇台灣辦簽證的相關業務
hue-ho̍k kok-bîn tī Tâi-uân pān tshiam-tsìng ê siong-kuan gia̍p-bū


*章計平 外交部發言人

希望會當佇上短的時間
Hi-bāng ē-tàng tī siōng té ê sî-kan

得著瑞典的同意
tit-tio̍h Suī-tián ê tông-ì

也就是同意咱的高中生
iā tō-sī tông-ì lán ê ko-tiong-sing

嘛會當利用網路的方式
mā ē-tàng lī-iōng bāng-lōo ê hong-sik
來辦簽證
lâi pān tshiam-tsìng

外交部回應
Guā-kau-pōo huê-ìng

已經參瑞典辦事處交涉
í-king tsham Suī-tián pān-sū-tshù kau-sia̍p

予學生簽證
hōo ha̍k-sing tshiam-tsìng

包含高中在內
pau-hâm ko-tiong tsāi-lāi

會當上網辦理
ē-tàng tsiūnn-bāng pān-lí

另外加拿大的部分
līng-guā Ka-ná-tāi ê pōo-hūn

猶閣咧爭取
iáu koh leh tsing-tshú

嘛會全盤思考
mā ē tsuân-puânn su-khó

按怎方便國民辦簽證的代誌
án-tsuánn hong-piān kok-bîn pān tshiam-tsìng ê tāi-tsì