【看世事講台語】牛牢內觸牛母

台語編輯 / 李江却台語文教基金會


標題：不滿董事會惡鬥 輔英創辦人欲捐校
Put-buán táng-sū-huē ok tàu, Hú-ing tshòng-pān-jîn beh kuan hāu.

標題：後生干涉欲奪權 爸囝衝突煞結怨
Hāu-senn kan-sia̍p beh tuat-kuân, pē-kiánn tshiong-tu̍t suah kiat-uàn.

標題：私校經營出問題 教育部:政府袂當接管
Su-hāu king-îng tshut būn-tê, Kàu-io̍k-pō͘：tsìng-hú bē-tàng tsiap-kuán.

諺語：牛牢內觸牛母
Gû-tiâu lāi tak gû-bó.

這是時行佇民間的諺語，定提來講有內部紛爭的狀況。「牛牢」是關牛的牛欄，「觸」是用牛角去牴觸別的牛，這句是講公牛只會在牛欄內鬥母牛耍威風，對外無本事。家族經營學校，應該同心協力、積聚四方資源，起造涎（siânn）人入學的風評，今（tann）傳出內鬥的消息，學校毋知有未來–無？
 
 
半版廣告刊登欲捐出輔英科技大學

Puànn-pán kóng-kò khan-ting beh kuan-tshut Hú-ing Kho-kī Tāi-ha̍k

佮病院的聲明
kap pēnn-īnn ê sing-bîng,

簽名的就是輔英創辦人張鵬圖
tshiam-miâ–ê tō sī Hú-ing tshòng-pān-jîn Tiunn Phîng-tôo,

四个理由寫甲真大篇
Sì ê lí-iû siá kah tsin tuā phinn.

張鵬圖指出
Tiunn Phîng-tôo tsí-tshut,

無想欲予家己
bô siūnn-beh hōo ka-kī

一手創立的學校佮病院
it-tshiú tshòng-li̍p ê ha̍k-hāu kap pēnn-īnn

變成董事會惡鬥的場所
piàn-sîng táng-sū-huē ok-tàu ê tiûnn-sóo.

希望無條件捐予國家
Hi-bāng bô tiâu-kiānn kuan hōo kok-ka,

佇咧這進前
tī leh tse tsìn-tsîng,

十五號張鵬圖嘛召開學校的會議
tsa̍p-gōo hō Tiunn Phîng-tôo mā tiàu-khui ha̍k-hāu ê huē-gī,

對所有的教職員工佮校友
tuì sóo-ū ê kàu-tsit uân-kang kap hāu-iú

說明這个決定
suat-bîng tsit ê kuat-tīng.

*張鵬圖 輔英科技大學創辦人

決定欲共捐出來
Kuat-tīng beh kā kuan–tshut-lâi,

因為有真濟歹後進
in-uī ū tsin tsē pháinn āu-tsìn.

學校公佈十五號的會議畫面
Ha̍k-hāu kong-pòo tsa̍p-gōo hō ê huē-gī uē-bīn,

轉達張鵬圖的想法
tsuán-ta̍t Tiunn Phîng-tôo ê siūnn-huat.

就是因為張鵬圖佮後生張惠人
Tō sī in-uī Tiunn Phîng-tôo kap hāu-sinn Tiunn Huī-jîn,

長期理念袂合
tn̂g-kî lí-liām bē ha̍h,

佇咧這個月十三
tī leh tsit kò gue̍h tsa̍p-sann,

張鵬圖嘛佇咧學校的網路
Tiunn Phîng-tôo mā tī leh ha̍k-hāu ê bāng-lōo

發表公開批
huat-piáu kong-khai-phue.

內容就指出後生張惠人
Luē-iông tō tsí-tshut hāu-sinn Tiunn Huī-jîn,

已經予人撤除執行董事兩冬
í-king hōo lâng thiat-tû tsip-hîng táng-sū nn̄g tang,

煞一直插校政
suah it-ti̍t tshap hāu-tsìng,

予伊真慼心
hōo i tsin tsheh-sim.

進前伊嘛捌因為校務
Tsìn-tsîng i mā bat in-uī hāu-bū,

告後生偽造文書
kò hāu-sinn guī-tsō bûn-su.

張鵬圖的查某囝張可欣
Tiunn Phîng-tôo ê tsa-bóo-kiánn Tiunn Kho-him,

仝款佇咧學校任職
kāng-khuán tī leh ha̍k-hāu jīm-tsit.

早起伊嘛出面
Tsái-khí i mā tshut-bīn

支持老爸的決定
tsi-tshî lāu-pē ê kuat-tīng.

*張可欣主任 輔英科大公共事務室

第一 我是in查某囝 張可欣
Tē-it guá sī in tsa-bóo-kiánn Tiunn Khò-him,
仝時我嘛是學校的公共事務室主任
kāng-sî guá mā sī ha̍k-huā ê kong-kiōng sū-bū-sik tsú-jīm.

我佇遮 學校嘛佇遮
Guá tī tsia, ha̍k-hāu mā tī tsia.

因為昨昏的代誌
In-uī tsa-hng ê tāi-tsì,

阮得著學生佮校友大力支持
gún tit-tio̍h ha̍k-sing kap hāu-iú tāi-li̍k tsi-tshî

創辦人的決心
thòng-pān-jîn ê kuat-sim.

輔英科技大學
Hú-ing Kho-ki Tāi-ha̍k

目前有一萬外名的學生
bo̍k-tsîng ū tsi̍t bān guā miâ ê ha̍k-sing.

學校鬧出遮爾大的風波
Ha̍k-hāu nāu-tshut tsiah-nī tuā ê hong-pho,

有學生聽了真煩惱課業會受著衝擊
ū ha̍k-sing thiann-liáu tsin huan-ló khò-gia̍p ē siū-tio̍h tshiong-ki̍k.


*輔英科大學生

干焦是較…彼个張惠人
Kan-tann sī khah…hit-ê Tiunn Huī-jîn.

就是因為驚學校彼lō
Tō sī in-uī kiann ha̍k-hāu hit-lō

予人賣去按呢
hōo lâng bē–khì án-ne.

輔英科技大學對職業學校開始
Hú-ing Kho-ki Tāi-ha̍k tuì tsit-gia̍p ha̍k-hāu khai-sí,

成立到這馬已經53冬
sîng-lip kàu tsit-má í-king gōo-tsa̍p sann tang,

加上附設的病院
ka-siōng hù-siat ê pēnn-īnn,

經營情形真好
king-îng tsîng-hîng tsin hó,

總資產有五十億
tsóng tsu-sán ū gōo-tsa̍p ik.

但是根據私立學校法
Tān-sī kin-kì Su-li̍p Ha̍k-hāu Huat,

私校是財團法人
su-hāu sī tsāi-thâun huat-jîn,

袂使捐予政府
bē-sái kuan hōo tsìng-hú,

政府嘛袂使接管
tsìng-hú mā bē-sái tsiap-kuán.

欲退場干焦會使轉型
Beh thè-tiûnn kan-tann ē-sái tsuán-hîng

做文教抑是社會福利機關
tsò bûn-kàu ia̍h-sī siā-huē hok-lī ki-kuan.

教育部初步希望輔英
Kàu-io̍k-pōo tshoo-pōo hi-bāng Hú-ing

會使透過董事會改選
ē-sái thàu-kuè táng-sū-huē kái-suán,

解決這層風波
kái-kuat tsit tsân hong-pho.